Գյումրու «Մայր Հայաստան» հուշահամալիրի անհայտ զինվորի գերեզմանի անմար կրակի աստղը գլխիվայր շուռ են տվել (տես լուսանկարում)։
Գյումրեցի ընդդիմադիր քաղաքական գործիչ Կարապետ Պողոսյանը իր ֆեյսբուքյան էջում լուսանկար էր հրապարակել՝ հարցնելով՝ «Սա սատանի՞զմ է, թե՞ անփութություն»։
«Մի քանի օր է՝ բողոքներ էի ստանում, որ Գյումրու «Մայր Հայաստան» հուշահամալիրում անմար կրակի աստղը փոխել, գլխիվայր են շրջել՝ սատանի տեսք հաղորդելով։ Չգիտեմ սա դիտավորություն է, թե՞ անփութություն, բայց կա փաստ, որ աստղը հակառակ է դրված։
Կարդացեք նաև
Ակնկալում եմ, որ Գյումրու քաղաքապետարանը արագ կշտկի խնդիրը, կարևոր է իմանալ նաև՝ ո՞վ, ե՞րբ է կատարել փոփոխությունները»,-հարցրել էր Կարապետ Պողոսյանը։
Նա մեզ հետ զրույցում նշեց, որ աստղի՝ գլխիվայր շրջվելը նկատել է ԱՄՆ-ում բնակվող գյումրեցի հայտնի սպորտսմեններից մեկը (անուն-ազգանուն չցանկացավ նշել), որը տեսել է պատահաբար, խառնվել է իրար ու տեղեկացրել իրեն։
Երկրորդ անգամ այլ մարդուց ահազանգ ստանալով՝ Կարապետ Պողոսյանը գնացել ու համոզվել է՝ ինչ-որ մեկը սատանայությամբ է զբաղվում։
«Քանդակագործության ազգային պարկ- թանգարանի» տնօրեն Արթուր Գևորգյանն էլ Aravot.am-ի հետ զրույցում տեղեկացրեց, որ այն պետական մշակութային անձնագրով հուշարձան է, ու որևէ մարմին իրավունք չունի միջամտություն, փոփոխություններ, շտկումներ կատարելու՝ առանց կրթության, գիտության, մշակույթի և սպորտի նախարարության պատմության և մշակույթի հուշարձանների պահպանության վարչության թույլտվության։
Ըստ Արթուր Գևորգյանի, տեղական որևէ կառույցի կողմից հուշարձանին ձեռք տալը քրեորեն պատժելի արարք է։
հուշարձանի նախկին տեսքը
Նշենք, որ «Սև Բերդի» մոտակայքում գտնվող «Մայր Հայաստան» հուշարձանը հանդիսավոր կերպով բացվել է 1975 թվականի մայիսի 9-ին Հայրենական մեծ պատերազմի 30-ամյակի առթիվ՝ հավերժացնելու պատերազմում մասնակցած բազմաթիվ գյումրեցիների հիշատակը։
Հուշարձանի հեղինակները ԽՍՀՄ ժողովրդական նկարիչ, քանդակագործ Արա Սարգսյանը և վաստակավոր ճարտարապետ Ռաֆայել Եղոյանն են։
Հուշարձանի դիմաց գտնվում է հավերժական կրակով անհայտ զինվորի գերեզմանն ու կողքին վեր բարձրացած սեղմված բռունցքը ։
Նունե ԱՐԵՎՇԱՏՅԱՆ
