Վրաստանի, Ադրբեջանի և Թուրքիայի երկաթուղիների ղեկավարները ստորագրել են Բաքու-Թբիլիսի-Կարս երկաթուղով բեռնափոխադրումների կազմակերպման վերաբերյալ փոխըմբռնման հուշագիր։
Վրաստանի երկաթուղիների գլխավոր տնօրեն Լաշա Աբաշիձեի, Ադրբեջանի երկաթուղիների (ADY) նախագահ Ռովշան Ռուստամովի և Թուրքիայի պետական երկաթուղու TCDD Taşımaçılık գլխավոր տնօրեն Ուֆուկ Յալչինի հանդիպումը տեղի է ունեցել Ղազախստանի Ալմաթի քաղաքում՝ «Տրանսպորտի շաբաթվա» շրջանակներում։
Կողմերը պայմանավորվել են բարձրացնել Բաքու-Թբիլիսի-Կարս երթուղու մրցունակությունը այլ տրանսպորտային միջանցքների համեմատ, օպտիմալացված առաքման ժամկետներով ներգրավել լրացուցիչ բեռնափոխադրումներ և կիրառել մրցակցային սակագներ, որոնք կապահովեն բեռնափոխադրման կայուն պայմաններ և թափանցիկ գնագոյացում։
Ինչպես նշվեց, հանդիպման նպատակն էր ստեղծել կայուն և կանխատեսելի աշխատանքային ռեժիմ երկաթուղային երթուղու երկայնքով, բարելավել բեռների սեփականատերերի պայմանները և ավելացնել փոխադրումների ծավալները։ Ընդգծվել է, որ առաքման ժամկետների պահպանումը երթուղու գրավչության հիմնական տարրն է փոխադրողների համար։
