Հոկտեմբերի 2-ը ուժ չգործադրելու միջազգային օրն է՝ հաստատված ՄԱԿ-ի կողմից 2007 թվականին։ Օրվա խորհուրդը ևս մեկ հնարավորություն է միջազգային հանրությանը ներկայացնելու Ադրբեջանի կողմից արցախահայության դեմ կիրառված բռնի ուժի տարբեր դրսևորումները՝ դրանց դատապարտման և հետագա բռնությունների կանխարգելման նպատակով։
ՄԱԿ-ը, ընդունելով հիշյալ փաստաթուղթը, կոչ է անում անդամ պետություններին հաշվի առնել մարդու հիմնարար իրավունքները և պայքարել ցանկացած տեսակի բռնության դեմ՝ վերահաստատելով ֆիզիկական և հոգեբանական բռնություն չկիրառելու սկզբունքը, որը պետք է լինի պետությունների փոխհարաբերությունների և հասարակությունների խաղաղ գոյատևման հիմքում։ ՄԱԿ-ն ընդգծում է նաև, որ հանդուրժողականությունը և մարդու իրավունքների հանդեպ անվերապահ հարգանքը փոխկապակցված են և ամուր հիմք բռնության դեմ պայքարի մշակույթի ձևավորման և գործարկման խնդրում։
Կարևոր է արձանագրել, որ Ադրբեջանը, հանդիսանալով ՄԱԿ-ի անդամ պետություն և քաջ գիտակցելով բռնությունից զերծ մնալու կարևորությունն ու այն մատնանշող միջազգային պայմանագրերի իրավական ուժը, չի հրաժարվել ուժի կիրառման և այն փառաբանող քաղաքականությունից, որի հետևանքով խախտվել է ՄԱԿ-ի կողմից ուժի կիրառման կանոնադրական արգելքը, հրահրվել են պատերազմներ, թիրախավորվել են խաղաղ բնակավայրեր, երեխաներ և քաղաքացիական անձինք, ոչնչացվել են քաղաքացիական ենթակառուցվածքներ, վախի, խոշտանգումների, բռնությունների համակարգված կիրառմամբ հարյուր հազարավոր արցախահայեր զրկվել են իրենց պատմական հայրենիքում ապրելու և արարելու հիմնարար իրավունքից, ինքնությունից, համայնքային կյանքից, պատմական գերեզմանոցներից և պատմական ժառանգությունից։ Հստակորեն կարելի է արձանագրել նաև, որ Բաքվի բանտերում պահող հայ գերիները նույնպես ենթարկվել են ֆիզիակական և հոգեբանական բռնաճնշումների, խոշտանգումների և մարդու իրավունքների համատարած խախտումների։
Լեռնային Ղարաբաղի փախստականների իրավապաշտպան միությունը միանում է ուժի կիրառումն արգելող օրվա խորհրդին և հորդորում միջազգային կազմակերպություններին, այդ թվում՝ ՄԱԿ-ի անդամ պետություններին հետևողական լինել Ադրբեջանի վարած քաղաքականության նկատմամբ, որի հետևանքով Լեռնային Ղարաբաղը ամողջապես հայաթափվեց՝ իր հողի վրա թողնելով հազարավոր տարիների մշակութային և պատմական հարուստ ժառանգությունը։
Կարդացեք նաև
ԼՂ փախստականների իրավապաշտպան միություն
