«Թուրքական ավիաուղիները» օրերս հայտարարել էր դեպի Երեւան չվերթներ սկսելու մասին՝ կախված հնարավորություններից եւ շուկայական պայմաններից։
Այսօր ԱԺ ճեպազրույցների ժամին ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանն ասաց, որ «Թուրքական ավիաուղիների»՝ հայաստանյան շուկա մուտքի հարցը տասնյակ տարիներ քննարկվել է, բայց միշտ քաղաքական նպատակով ավիաընկերությունը Հայաստան մուտք չի գործել։
«Եթե հիշում եք, հատուկ ներկայացուցիչների վերջին հանդիպման ժամանակ մամուլի հաղորդագրության մեջ կար նաեւ այդպիսի նշում, որ ավիափոխադրումների ոլորտում պետք է ակտիվացնել համագործակցությունը։ Եվ, ահա, տեսնում ենք, որ «Թուրքական ավիաուղիները» արդեն հայտնել են, որ սկսում են թռիչքներ դեպի Երեւան։ Չգիտեմ, թե սա երբ կլինի, որովհետեւ այնտեղ տեխնիկական եւ իրավական հարցեր կան, բայց դա մի բան է, որը տեղի կունենա առաջիկայում»,- ասաց նա։
Մանրամասները՝ տեսանյութում
Կարդացեք նաև
Խանդանյանի խոսքով՝ Թուրքիայի հետ այլ պայմանավորվածություններ էլ կան այդ հանդիպման արդյունքում, մասնավորապես, ակադեմիական փոխանակումների, փոխվստահության ամրապնդման միջոցառումների եւ այնի վերաբերյալ։ «Իմ համոզմամբ՝ որեւէ խնդիր չկա, որպեսզի հարաբերություններն ամբողջ ծավալով կարգավորվեն։ Եվ մենք այս առումով սպասում ենք թուրքական կողմի գործուն քայլերին, որովհետեւ ՀՀ եւ Թուրքիայի միջեւ չկան հարաբերությունների կարգավորման համար խոչընդոտներ»,- հավելեց Խանդանյանը։
Ամբողջական տեսանյութը՝ այստեղ
Ռոզա ՀՈՎՀԱՆՆԻՍՅԱՆ
