ՀՀ ԱԺ «Հայաստան» դաշինքի պատգամավոր Գառնիկ Դանիելյանը «Հայելի» ակումբում անդրադառնալով Հայ Առաքելական Սուրբ եկեղեցու երկու սրբազանների՝ Միքայել Աջապահյանի, Բագրատ Գալստանյանի ու եւս 17 արդարների դատավարությանը՝ ասաց. «Սկսեմ երեկվա դատական նիստից:
Փաստաբան Խուդոյանը եւ մնացած փաստաբանները շատ առարկայական ներկայացրեցին այն իրավիճակը, որ ստեղծվել է, մանրամասն անդրադարձան կեղծ դրվագներին, որի մեջ մեղադրվում են Սրբազան պայքարի մասնակիցները եւ առաջնորդները: Հարցումներ ուղղեցին մեղադրող կողմին եւ դատավորին, թե ինչի մեջ են մեղադրվում: Նրանք խոսել են, որ իշխանափոխությունից հետո այն մարդիկ, որոնք դավաճանություն են գործել, պետք է ենթարկվեն պատասխանատվության, քննարկել են տարբեր երկրներում պատժի մեթոդները:
Ուզում եմ հիշեցնել, որ ես ԱԺ-ում ընթերցել եմ սրբազանի նամակը, որում հստակ հարցեր կային: Եվ այդ հարցերի պատասխանները չկան: Քանի օր անցել է՝ ձայնները կտրած, բերանները ջուր առած են: Աղաղակող ապօրինություն է: սուտ ու կեղծիքն էլ չափեր ունի, բայց սրանք անցել են բոլոր սահմանները»: ՀՅԴ պատգամավորը հավաստիացրեց, որ բոլոր նրանք, ովքեր մասնակցել են այս կեղծ դատական գործը կազմելուն, ժամանակը կգա եւ այդ մարդիկ պատժի առաջ են կանգնելու:
Գառնիկ Դանիելյանը անդրադարձավ նաեւ ԱԺ արտահերթ նիստում Հայաստանի եւ Ադրբեջանի միջեւ խաղաղության հաստատման վերաբերյալ հայտարարության ընդունմանը: «Դա հապճեպորեն, ոտքի վրա ընդունված նախագիծ է: Առավոտյան ոչ մեկը չգիտեր, որ ԱԺ-ում հայտարարության նախագիծ է լինելու:
Կարդացեք նաև
Առավոտյան 9:30 խորհրդի նիստ են անում, բերում, թուղթը դնում, ասում են՝ սա է, ժողովուրդ ուրախացեք: Ինչի՞ վրա ուրախանան: Ձեր հերթական պարտությունն արձանագրելո՞ւ: Ի՞նչ կա այդտեղ ուրախանալու: Ուրախացողը՝ ուրախանում է: Ադրբեջանցիները ուրախանում են: Դուք ինչի՞ վրա եք ուրախանում: Ոչ ադրբեջանցիներն են օկուպացված տարածքներից հետ գնացել, ոչ ռազմագերիներն են ազատ արձակվել, պատանդառված 191 մեր հայրենակիցները այնտեղ են ու դուք նրանց հարազատներին ՊՆ-ի առջեւ քաշքշում էիք:
ԱԱԾ պետն էր գնացել Բաքու: Միայն մի բանի համար պետք է գնաս Բաքու: Որ այնտեղից գերիներ բերես, եթե ոչ ամբողջը, ապա մի զգալի մասին»,-ասաց ընկեր Դանիելյանը:
Աշոտ ՀԱԿՈԲՅԱՆ
