Փարաքար համայնքի ավագանու արտահերթ նիստում կայացավ համայնքի ղեկավարի ընտրություն, եւ ընտրվեց «Ապրելու երկիր» կուսակցության ընտրական ցուցակի երկրորդ համար անդամ Օնիկ Ախվերդյանը։
Համայնքի նախկին ղեկավար Վալոդյա Գրիգորյանի սպանությունից հետո սա առաջին նիստն էր: Նիստին չէին ներկայացել «Քաղաքացիական պայմանագիր» եւ «Ազգային առաջընթաց» խմբակցությունների անդամները։ Նշենք, որ ՔՊ խմբակցությունում Դավիթ Ախտոյանն է՝ Մհեր Ախտոյանի եղբայրը:
«Ապրելու երկիր» կուսակցության համահիմնադիր Մեսրոպ Առաքելյանն ասաց, որ ՔՊ-ի որոշումն է չմասնակցել ավագանու նիստին, եւ ինքը չի ցանկանում դա մեկնաբանել: Ինչ վերաբերում է իրենց խմբակցությանը, շեշտեց, որ այն ավագանիում մեծամասնություն է, եւ իրենց մանդատները լիովին բավարարում են որոշումներ կայացնելու համար:
Կարդացեք նաև
Փարաքար համայնքի նորընտիր ղեկավար Օնիկ Ախվերդյանը պատասխանելով լրագրողների հարցերին՝ ասաց, որ եթե կասկածեր, այս գործը չէր ստանձնի: Ինչ վերաբերում է ՔՊ եւ «Ազգային առաջընթաց» խմբակցությունների՝ նիստին չմասնակցելուն, Ախվերդյանն այսպես արձագանքեց. «Երեւի այդպես են հարմար գտել, ես ոչ մեկի հետ ոչ մի խնդիր չունեմ, ուղղակի երեւի չեն ցանկացել մասնակցել»:
Նա ասաց, որ տեղյակ չէ, թե ինչ ծեծկռտուք է եղել երեկ, հորդորեց իրավապահներից մանրամասներ ճշտել:
«Ապրելու երկիր» կուսակցության համահիմնադիր Մանե Թանդիլյանը լրագրողների հարցերին պատասխանելիս ասաց. «Որեւէ մեկն իր նպատակին չի հասնելու…Ուզում եմ՝ բոլորն իմանան, որ Վալոդիայի գործը չի ավարտվել, նրա հեղինակությունն այնպիսին է, որ Փարաքար համայնքը ծաղկելու է նաեւ նրա անվան ներքո »:
Հարցին՝ իրավապահների բացահայտումներն իրեն գոհացնո՞ւմ են, Մանե Թանդիլյանն այսպես արձագանքեց. «Սպանություն կատարողին բացահայտել, չի նշանակում՝ ոճրագործությունը բացահայտել: Մենք մինչեւ վերջ գնալու ենք, յուրաքանչյուր ոք պատասխան է տալու այս ոճրագործության համար»:
Տեսանյութն՝ ամբողջությամբ.
Գոհար ՀԱԿՈԲՅԱՆ
