Անհետ կորած զինծառայող Սարգիս Ղուկասյանի հորեղբորը` Արսեն Ղուկասյանին, դատավոր Մասիս Մելքոնյանի որոշմամբ, կալանավորեցին մեկ ամիս ժամկետով:
Վերին Շորժայի դիրքերում պատերազմի ժամանակ անհետ կորած, ապա դին հայտնաբերած Սերյոժա Ղազարյանի հայրը՝ Սերժ Ղազարյանը, «Հրապարակի» հետ զրույցում անդրադառնալով զոհվածների հարազատների նկատմամբ այս հետապնդումներին եւ իշխանությունների կեցվածքին, նկատեց. «Ես` որպես ծնող, շատ հարցեր ունեմ սրանց: Մինչեւ անցած տարի իմ տղայի գործը քննչական մարմինների սեղանին դրված էր: Այսքան ժամանակ է անցել. ո՞վ դատվեց, ո՞վ պատասխան տվեց` ոչ մեկը:
Քահանաներից ու բարեգործներից պրծան, հիմա անցել են անհետ կորած զինվորների ծնողների՞ն: Մինչեւ ո՞ւր են գնալու այսպես: Նեղվո՞ւմ են, որ պաշտպանության նախարարության մոտ ակցիա են անում, բա ի՞նչ անեն: Առողջ տղերք ենք տվել իրենց, պահել, մեծացրել ենք, առայսօր ո՛չ դիակ են տվել մեծ մասին, ո՛չ էլ հստակ բան են ասում, ամեն ինչ անհայտ է: Այ քեզ բան, այսօր նույնիսկ մի փոքր միջադեպի դեպքում տանում՝ մարդկանց դատում են, բա մարդն իր տղային պահել-մեծացրել է, տվել է բանակին, ու նման անորոշ վիճա՞կ: Ու դեռ անամոթաբար Փաշինյան կոչեցյալը հայտարարում է, թե ինչո՞ւ ենք մեր երեխաներին ուղարկել Ադրբեջանի տարածք:
Այդ նույն Փաշինյանն ինչո՞ւ չի խոսում սեպտեմբերյան մարտերի մասին, ինչո՞ւ չի ասում, որ ադրբեջանցիները հասել են Ջերմուկ, Վերին Շորժա, 6 կիլոմետրով, 4 կիլոմետրով, 2 կիլոմետրով ադրբեջանցիները մեր տարածքում առաջ են եկել: Ինչո՞ւ նահանջի հրաման չտվեց, որ գոնե տղաները հետ գային, հետո նախահարձակ ճանապարհով մեր դիրքերը հետ վերցնեին:
Կարդացեք նաև
Պատկերացնո՞ւմ եք` իմ տղային ես մի կերպ, իմ ուժերով եմ գտել, ու հենց նրա ծննդյան օրը հուղարկավորությունն է եղել…. դա ինձ համար կրկնակի ցավ է, ոչ մեկին չեմ ցանկանա այդ ցավը: Պետությունն ինձ «նվեր արեց», իմ որդու ծննդյան օրը նրա թաղումն էր` նոյեմբերի 7-ին: Սարսափելի բան է»:
Հայկ ԳԵՎՈՐԳՅԱՆ
Հոդվածն ամբողջությամբ՝ «Հրապարակ» օրաթերթի այսօրվա համարում:
