ՀՀ էկոնոմիկայի նախարար Գևորգ Պապոյանը հոկտեմբերի 9-ին մասնակցել է ֆրանսիական զբոսաշրջային խոշորագույն Manor ցանցի 30-րդ տարեկան համագումարին։ MANOR-ը միավորում է Ֆրանսիայի զբոսաշրջության ոլորտի 80 ընկերություն՝ ներկայացնելով 450 ֆիզիկական վաճառքի կետ և 2,5 միլիարդ եվրո տարեկան շրջանառություն։
🔹Ողջունելով մասնակիցներին՝ նախարար Գևորգ Պապոյանը կարևորել է միջոցառման անցկացումն Հայաստանում՝ ընդգծելով դրա նշանակությունը երկրի զբոսաշրջության ոլորտի զարգացման տեսանկյունից։
💬 «Ֆրանսիան մեր զբոսաշրջիկների համար առաջնային ուղղություններից մեկն է։ Ձեր երկրի հարուստ պատմությունը, մշակույթը, գինու և խոհանոցի ավանդույթները, ինչպես նաև ձեր տասնամյակների փորձը զբոսաշրջության ոլորտում մշտապես ոգեշնչել են մեզ։ Մենք հավատում ենք, որ փոխադարձ զբոսաշրջային հոսքերի խթանումը՝ Հայաստանից դեպի Ֆրանսիա և հակառակը, կնպաստի մեր ժողովուրդների ավելի խորը փոխըմբռնմանը և երկուստեք տնտեսական աճին»։
🛫 Նախարարն իր խոսքում անդրադարձել է նաև երկու երկրների միջև ավիացիոն կապերի զարգացման կարևորությանը՝ մատնանշելով Փարիզից, Լիոնից և Մարսելից դեպի Երևան արդեն իսկ գործող ուղիղ չվերթները։ Այս համատեքստում նախարարը նշել է, որ Հայաստանը ձգտում է ընդլայնել այդ ցանցը՝ ստեղծելով ավելի հարմար պայմաններ զբոսաշրջիկների, ներդրողների և գործարարների համար։
Կարդացեք նաև
Եռօրյա այցի ընթացքում ֆրանսիացի մասնակիցները հնարավորություն կունենան բացահայտելու Հայաստանի զբոսաշրջային ներուժն ու ձևավորելու գործարար կապեր հայ գործընկերների հետ։
Միջոցառմանը ներկա են եղել ՀՀ-ում Ֆրանսիայի արտակարգ և լիազոր դեսպան Օլիվյե Դըկոտինյին, GIE MANOR-ի նախագահ Գրեգորի Մավոյանը, ՀՀ ԷՆ Զբոսաշրջության կոմիտեի նախագահ Լուսինե Գևորգյանը, Ֆրանսիայի զբոսաշրջության ոլորտի մոտ 180 մասնագետներ, ինչպես նաև Air France, Transavia, Etihad, British Airways և այլ ավիաընկերությունների, Hertz, Europcar և այլ ավտոմեքենայի վարձույթ տրամադրող ընկերությունների, ինչպես նաև Expedia, Amadeus, Hotelbeds և այլ ամրագրման հարթակների ներկայացուցիչներ։
ՀՀ էկոնոմիկայի նախարարություն
