Երևանի ընդհանուր իրավասության քրեական դատարանը՝ դատավոր Ջոն Հայրապետյանի նախագահությամբ, հեռացել է խորհրդակցական սենյակ՝ մարտադաշտն ինքնակամ լքելու մեջ մեղադրվող Իշխան Վահանյանի գործով վճիռ կայացնելու։ Վճիռը կhրապարակվի վաղը՝ 17:00-ին։
Նշենք, որ հանրային մեղադրող Գևորգ Ավետիսյանը միջնորդել է Իշխան Վահանյանին դատապարտել ազատազրկման՝ 18 տարի ժամկետով։
Այսօրվա նիստում գործի քննությունն ավարտվեց։ Տուժողների իրավահաջորդներն իրենց ռեպլիկներում շեշտադրում էին՝ ոչ միայն Իշխան Վահանյանին, այլև՝ նրան հրաման տվողներին, այլ պաշտոնատար անձանց պատասխանատվության ենթարկելու անհրաժեշտության մասին, պնդում՝ Վահանյանը պետք է դատապարտվի ավելի քան 20 տարվա ազատազրկման։
Զոհված զինծառայողներից մեկը հայրը՝ Գեղամ Ղազարյանը, հայտարարեց, որ Վահանյանը լքել է մարտադաշտն՝ հայրենիքից առավել կարևորելով ինքն իրեն, մինչդեռ, եղել են զինծառայողներ, որոնք վիրակապերով կռվել են, անգամ վիրավորներ են եղել, որոնց Վահանյանը վիրավորների համար նախատեսված մեքենայով չի տարել, միայնակ է փախուստի դիմել։
Կարդացեք նաև
«Դատավճիռը կարդալուց շատ ուշադիր եղեք, պատկերացրեք՝ ձեր երեխեքը ծառայում են ու այս սրիկաներն իրենց հրամանատարն են»,- նշեց նա՝ հավելելով, որ նրան պետք է ավելի քան 20 տարի ժամկետով ազատազրկել, զինվորական կոչումներից էլ՝ զրկել, քանզի դավաճան է։ Ծնողներից մյուսը՝ Հրանտիկ Հարությունյանն էլ Վահանյանի գործողություններում անզգուշություն անզգուշություն նշում է՝ պետք է ցմահ տալ, ապա՝ հիշեցնում՝ և զինծառայողների նորակոչիկ լինելը, իր որդու շրջափակման մեջ գտնվելն ու մինչև վերջ կռվելը, Վահանյանն, անգամ, չի օգնել հայտնաբերել զինծառայողներին։ Մասնավորապես, Հրանտիկ Հարությունյանը հիշեցրեց, որ որդին ավելի քան երեք ամիս շրջափակման մեջ է եղել, մինչև վերջ կռվել և զոհվել դեկտեմբերին՝ Վահանյանի դավաճանության հետևանքով։
«Անզգուշության հարց չկա, ինքը մտածված իմացել է, որ եթե կապի միջոցը տանի, էդ զորքն արդեն անտեր է, մանավանդ, որ մոբ-ի քեռին իրեն զանգել է, էլ ի՞նչ անզգուշության մասին է խոսքը։ Դու ի՞նչ հրամանատար, որ փախել ես, եկել ես էստեղ, ասում ես՝ երկու անչափահաս էրեխա ունեմ․․․ Իմ էրեխեն անչափահաս չէ՞ր, իմ էրեխեն հիվանդ է եղել, դու էդ էրեխուն տիրություն չես արել, ես եմ դեղեր առել, ուղարկել»,- վրդովվեց Հարությունյանը, ինչին տեղից արձագանքեց Վահանյանը, թե ինքը բուժվարչությունից չէ, Հարությունյանն էլ արձանագրեց՝ «հրամանատար ես եղել»։
Ռեպլիկներով հանդես եկած ծնողները նաև պահանջում են Վահանյանից՝ անուններ տալու, թե ովքեր են եղել իրեն հրաման տվողները, նշում են՝ եկել են վկայի կարգավիճակով, ապա՝ փախուստի դիմել։ Ըստ ամենայնի՝ խոսքը այժմ մեղադրյալի կարգավիճակ ունեցող Կարեն Առստամյանի մասին է, որի նկատմամբ հետախուզում է իրականացվում։
Մանրամասները՝ սկզբնաղբյուր կայքում։
