Թուրքիայի, Ադրբեջանի ու Վրաստանի պաշտպանության նախարարների Անկարայում կայացած հանդիպումից հետո Թուրքիայի պաշտպանության նախարար Յաշար Գյուլերն անդրադարձել է նաև Հարավային Կովկասին։
Ըստ Թուրքիայի պաշտպանության նախարարության հաղորդագրության՝ նա, մասնավորապես, ասել է․
Տարածաշրջանային հարցերում Թուրքիայի, Ադրբեջանի և Վրաստանի սերտ համագործակցությունն օրինակելի է
Թուրքիայի, Ադրբեջանի և Վրաստանի միջև խորը պատմական արմատներ ունեցող մտերմիկ հարաբերությունները ռազմավարական նշանակություն ունեն: Տարածաշրջանային հարցերում մեր ցուցաբերած սերտ համագործակցությունը օրինակելի է:
Հաստատեցինք մեր կամքը՝ երկկողմ և եռակողմ համագործակցությունը ուժեղացնելու համար
Վերջին շրջանում տեղի ունեցած զարգացումները հույս են ներշնչում՝ Հարավային Կովկասում խաղաղության, կայունության, տրանսպորտի և համագործակցության վրա հիմնված նոր դարաշրջան սկսելու համար:
Կարդացեք նաև
Այս համատեքստում այսօր կայացած հանդիպման ընթացքում, ելնելով տարածաշրջանում խաղաղ ապագա հաստատելու գաղափարից, մենք հաստատեցինք մեր կամքը՝ լայն ոլորտում, այդ թվում պաշտպանության, ռազմական և անվտանգության հարցերում, երկկողմ և եռակողմ համագործակցությունը ուժեղացնելու ուղղությամբ: Հանդիպման ընթացքում կրկին ընդգծեցինք մեր զորեղ աջակցությունը հատկապես Ադրբեջանի և Վրաստանի անկախությանը և տարածքային ամբողջականությանը:
Կովկասի ռազմավարական կարևորությունը
Ինչպես գիտեք, Կովկասը պատմական և ռազմավարական դիրքի շնորհիվ կարևոր է և՛ տարածաշրջանային կայունության, և՛ միջազգային անվտանգության հավասարակշռության համար: Թուրքիայի, Ադրբեջանի և Վրաստանի միջև սերտ համագործակցությունը ծառայում է մեր երկրների ընդհանուր շահերին և սպասումներին, և միաժամանակ մեծապես նպաստում է Կովկասի խաղաղությանը և կայունությանը: Մենք մեր օրինակելի, սերտ և ուժեղ համագործակցությունը հետագա զարգացնելու մեր կամքը հաստատեցինք ստորագրած Եռակողմ հանդիպման արձանագրությամբ: Համոզված եմ, որ կառուցողական երկխոսությունն ու համագործակցությունը շարունակվելու են առաջիկա շրջանում ևս:
