ԱՄՆ նախագահի կինը՝ Մելանիա Թրամփը հայտարարել է, որ Ռուսաստանի նախագահ Վլադիմիր Պուտինի հետ շարունակվող բանակցություններից հետո ուկրաինացի 8 երեխաներ վերամիավորվել են իրենց ընտանիքների հետ, հայտնում է Associated Press-ը։
ԱՄՆ առաջին տիկինը օգոստոսին նամակ էր գրել Պուտինին և ամուսնուն խնդրել Ալյասկայում Պուտին-Թրամփ հանդիպման ժամանակ այն անձամբ հանձնել ՌԴ նախագահին:
Սպիտակ տանը լրագրողների հետ զրույցում Մելանիա Թրամփը նշել է, որ Պուտինը պատասխանել է իր նամակին, և դրանից հետո նրանք «բաց հաղորդակցության ուղի» են հաստատել՝ այդ երեխաների բարեկեցության նպատակով։
Մելանյա Թրամփի խոսքով՝ Ռուսաստանն «օբյեկտիվ և մանրամասն տեղեկատվություն տրամադրելու պատրաստակամություն» է ցուցաբերում այս հարցի առնչությամբ։
Կարդացեք նաև
ԱՄՆ առաջին տիկինը կոչ է արել պաշտպանել երեխաներին՝ նշելով, որ դա կարելի է անել «գրչի մեկ հարվածով»։
«Մենք համաձայնել ենք համագործակցել՝ հօգուտ այս պատերազմում ներգրավված մարդկանց», – ասել է Մելանիա Թրամփը։
AP-ն նշում է. «Ուկրաինա Պուտինի ներխուժումը հանգեցրել է նրան, որ Ռուսաստանը ուկրաինացի երեխաներին դուրս է բերել իրենց իսկ երկրից, որպեսզի նրանք ՌԴ-ում կարողանան մեծանալ որպես ռուսներ:
Associated Press-ը փաստագրել է ուկրաինացի երեխաների առևանգումը 2022 թվականին, որից հետո Միջազգային քրեական դատարանը հայտարարել է, որ Պուտինին ձերբակալելու օրդեր է տվել պատերազմական հանցագործությունների համար՝ նրան մեղադրելով Ուկրաինայից երեխաների առևանգման համար անձնական պատասխանատվության մեջ»։
«Ռուսաստանի արտաքին գործերի նախարարությունը «ստահոդ» է որակել Կիևի հայտարարություններն այն մասին, թե Մոսկվան «բռնի կերպով երեխաներ է արտաքսել»:
Պուտինն էլ պնդել է, որ պատմությունն «ուռճացված» է. երեխաները ոչ թե առևանգվել են, այլ հակառակը՝ նրանց փրկել են՝ պատերազմական գոտուց տեղափոխելով»,- հայտնում է РБК-ն՝ նշելով, որ լրատվամիջոցը ԱՄՆ առաջին տիկնոջ հայտարարության վերաբերյալ հարցում է ուղարկել ՌԴ նախագահի մամուլի քարտուղար Դմիտրի Պեսկովին։
