«Աշխարհի բոլոր երկրները, երբ ունենում են իրենց քաղաքացիներին պատանդ վերցնելու իրողություն (իսկ Բաքվում պահվող հայերը միայն գերիներ չեն, այլ պատանդ են, որովհետեւ օգտագործվում են քաղաքական, ճնշումներ գործադրելու եւ այլ նպատակներով) պետությունների պարտքն է անմիջականորեն զբաղվել նրանցով: Ընդհանրապես պետությունները նրա համար են, որ երբ մարդկային խմբերը, ընտանիքները չեն կարողանում ինչ-որ բաներ անել, պետություններն են անում, որովհետեւ պետությունները գործիք են հասարակության համար:
Հայաստանի իշխանությունները կարեւորագույն հարցերում ոչ մի կապ չունեն մեր ժողովրդի հետ: Նրանք խոսում են այնպիսի բաներից, որոնք համամարդկային են եւ պարտադիր: Ամբողջ աշխարհն է ձգտում խաղաղության: Իրենց ասածը նույն է, եթե ասեն՝ մենք պայքարում ենք, որ արեւն առավոտները դուրս գա, մենք պայքարում ենք, որ գիշերը զով լինի…Այդպիսի հիմարություններ միայն մեր իշխանություններն են թույլ տալիս: Այո, պատերազմական գործողությունների ժամանակ դու պետք է ձգտես նաեւ թշնամուդ հետ ընդհանուր հայտարարի գալ կարեւորագույն արժեքների հարցում, բայց չպետք է դա շահարկես…»,-«Հայելի» ակումբում ասաց ԱԻՄ նախագահ Պարույր Հայրիկյանը:
«Ինչ վերաբերում է այս՝ մեզ բարոյապես ոչնչացնող երեւույթի նկատմամբ Հայաստանի իշխանությունների թշնամական վերաբերմունքին, ասեմ, որ մասնավորապես, երբ տեղի էր ունենալու ԱՄՆ նախագահի ներկայությամբ հանդիպումը, որեւէ բարեկիրթ մարդ շատ հանգիստ կասեր՝ գիտե՞ք ինչ, խաղաղության ձգտող պետությունները նախ եւ առաջ բարի կամք են դրսեւորում, մենք Հայաստանում որեւէ ադրբեջանցի գերի չունենք, նույնիսկ երեխայի սպանած մարդուն ազատ ենք արձակել:
Իսկ Ադրբեջանը անցյալում հերոսացրել է նաեւ քնած սպայի սպանությունը, եւ այսօր էլ շարունակում է՝ չնայած խաղաղության մասին մեր հայտարարություններին, այսօր ԱՄՆ-ում այդ բովանդակությունը նախաձեռնելու պահին մենք ունենք պատանդներ:
Կարդացեք նաև
Եթե Հայաստանից ԱՄՆ-ում լիներ որեւէ այլ հայ մարդ՝ ոչ Նիկոլը, ոչ նիկոլիզմի ներկայացուցիչ, այս բարձր ամբիոնից կասեր՝ հենց հիմա զանգահարում եք Բաքու, ասում եք՝ մի քանի ժամվա ընթացքում բոլոր գերիները լինեն Թբիլիսիում: Բայց դա չարվեց, մինչդեռ դա մեզ տրված իրական հնարավորություն էր:
Այս ամենը ցույց է տալիս, որ Հայաստանի իշխանությունները հայության հետ իրականում կապ չունեն: Կամ կապ ունեն այնքանով, որ մեր անունից ներկայանալով՝ ոտնահարում են մեր իրավունքները եւ իրենց հետին նպատակներն են հետապնդում»:
Գոհար ՀԱԿՈԲՅԱՆ
