«Ես ողջունում եմ Հայաստանի եւ Ադրբեջանի համատեղ դիմումը՝ փակելու Մինսկի խումբը։ Մենք հուսանք, որն այս ամբողջ գործընթացը կփակվի դեկտեմբերից ոչ ուշ»,- այսօր Երեւանում հրավիրած ասուլիսում ասաց ԵԱՀԿ գործող նախագահ, Ֆինլանդիայի ԱԳ նախարար Էլինա Վալտոնենը։
ԵԱՀԿ գործող նախագահը խուսափեց պատասխանել արցախցիների իրավունքի վերաբերյալ հարցին։ Նրան հարց ուղղվեց՝ եթե Մինսկի խումբը փակվում է, ինչպե՞ս է տեղի ունենալու արցախցիների վերադարձը եւ ինչպե՞ս են վերականգնվելու արցախցիների խախտված իրավունքները։
Իր պատասխանում Էլինա Վալտոնենը չխոսեց արցախցիների ու նրանց իրավունքների մասին։ «Այո, Մինսկի կառույցները կփակվեն ոչ ավելի ուշ, քան դեկտեմբերի 1-ը։ Եվ մենք բոլոր կետերը դիտարկում ենք այս հարցի շուրջ։ Իսկապես խորքային քննարկում ունեցանք պարոն նախարարի հետ, եւ ԵԱՀԿ-ն պատրաստ է սատարելու խաղաղության եւ կայունությանը Հայաստանում եւ տարածաշրջանում»,- ասաց նա։
Կարդացեք նաև
Հետագա համագործակցությանն անդրադառնալով՝ Էլինա Վալտոնենը նշեց, որ ԵԱՀԿ-ն պատրաստ է ընդլայնելու համագործակցությունը Հայաստանի հետ այն ոլորտներում, որտեղ Հայաստանը կկարողանա արժեք ստեղծել․ «Հատուկ շեշտադրումը կլինի այնտեղ, որտեղ նաեւ Հայաստանը կարող է ավելացված արժեքով հանդես գալ՝ տնտեսական բաղադրիչում կլինի, ինչպես նաեւ շրջակա միջավայրի եւ կլիմայի ուղղությամբ»։
ՀՀ ԱԳ նախարար Արարատ Միրզոյանն էլ, անդրադառնալով արցախցիների իրավունքների մասին հարցին, ասաց․ «Կուզեմ կրկին հիշեցնել ՀՀ քաղաքականությունն այս հարցում՝ մենք կարծում ենք եւ լրջագույն ջանքեր ենք գործադրում այն ուղղությամբ, որ տեղահանված մեր հայրենակիցները կարողանան ամբողջապես ինտեգրվել եւ իրենց կյանքը վերսկսել, շարունակել ՀՀ-ում՝ ինտեգրվելով ՀՀ հասարակությանը»։
Ռոզա ՀՈՎՀԱՆՆԻՍՅԱՆ
