-Դուք հիմա անարդարությամբ եք զբաղված, բարի եղեք համապատասխանել ձեր կանոնակարգին,- այսօր ՄԱԿ-ի երեւանյան գրասենյակի դիմաց դիմելով ՄԱԿ-ին՝ լրագրողների հետ զրույցում հայտարարեց Հայաստանի դեմոկրատական կուսակցության առաջնորդ Արամ Սարգսյանը:
Հիշեցնենք, որ Բաքվում ապօրինի պահվող գործարար Ռուբեն Վարդանյանի վերաբերյալ ՄԱԿ-ի՝ անձանց ապօրինի կալանավորման հարցերով հանձնաժողովը դեռ այս տարվա փետրվարին տվել է մի եզրակացություն , որը հավաստում է, թե գործարարի կալանքը կամայական չէ: Այս եզրակացության գոյությունն ի հայտ է եկել միայն վերջերս, երբ արգենտինացի իրավաբան Լուիս Մորենո Օկամպոն սկսել է իր հետաքննությունը, պարզել ու հրապարակել: Հենց այս եզրակացության չեղարկման պահանջով այսօր «Միասին» շարժման անդամները բողոքի ցույց են իրականացրել ՄԱԿ-ի երեւանյան գրասենյակի առջեւ:
Կարդացեք նաև
-Հիմա խոսենք մեր իշխանություն կոչվածից: Հայաստանի իշխանությունները լուռ են այս հարցում, եթե չլիներ Օկամպոյի հայտարարությունը, որեւէ մեկը չէր իմանա այդ եզրակացության մասին: Մենք չենք դիմում Նիկոլ Փաշինյանին, անիմաստ է, մեր հայտարարությունն ենք ուղարկել արտաքին գործերի եւ արդարադատության նախարարությանը:
Դիմում ենք ՄԱԿ-ին՝ գոնե դուք հավատարիմ եղեք ձեր ընդունած որոշումներին: Պարզ երեւում է, որ Հայաստանի իշխանությունները շահագրգիռ չեն գերիների վերադարձով: Գոնե այս պարագայում կարո՞ղ էին որեւէ բողոք ներկայացնել: Եթե շահագրգիռ են, որ մեր գերիները վերադառնան` լավագույն առիթն էր, որ հայտարարությամբ կամ պահանջով դուրս գային: Երեկ Շարմ Էլ Շեյխում խաղաղության համագումարում կարո՞ղ էր Փաշինյանը խոսել՝ ինչ անարդարություն է, բայց լեզուն չի պտտվում, մի հատ թարս խոսք Ալիեւին ասի: Ինքը չի պաշտպանում ՀՀ շահերը,- ասաց Արամ Սարգսյանը:
«Միասին» շարժման աջակից Մեսրոպ Եղիազարյանն էլ լրագրողների հետ զրույցում ՄԱԿ-ին անվանեց միջազգային ազգերի կոռուպցիոն կազմակերպություն. «Կազմակերպություն, որտեղ կոռուպցիան ուտում է ու իրենք խաղաղություն են ուզում երկիր մոլորակի համար: Դուք ոչնչացնում եք մարդկությանը, 35.000 երեխա կոտորվեց Գազայում, 150.000 արցախցի մնաց անտուն ու անհայրենիք, հիմա աշխարհի փողերն եք ուտում, հարամ լինի»:
ՄԱԿ-ի երեւանյան գրասենյակի ղեկավարը չընդունեց շարժման անդամներին , վերջիններս իրենց պահանջը փոխանցեցին գրասենյակի ընդունարանի աշխատակցին:
Արփինե ՍԻՄՈՆՅԱՆ
