«Իմ քայլը» դաշինքից ՀՀ ԱԺ 7-րդ գումարման պատգամավոր, պատմաբան, պատմական գիտությունների թեկնածու, ԵԽԽՎ-ում Հայաստանի պատվիրակության նախկին անդամ, ադրբեջանագետ Տաթևիկ Հայրապետյանի տելեգրամյան գրառումը
Հիշում եք, չէ՞ Ադրբեջանի նախագահականի աշխատակազմը 24 տարի ղեկավարած 87-ամյա ղեկավարին, որը մեղադրվում է պետական դավաճանության և իշխանազավթման մեջ ու որի նկատմամբ կա տնային կալանքի որոշում։ Ուրեմն, ադրբեջանական լրատվականները հաղորդում են, որ Ռամիզ Մեհդիևի վիճակը երեկ երեկոյան վատացել է. «Բժշկական զննման ժամանակ հաղորդվել է, որ Մեհդիևի նյարդային համակարգը խանգարվել է լարվածության և սթրեսի պատճառով, իսկ նրա արյան ճնշումը չափազանց բարձր է»։
Ընդ որում, դա եղել է այն բանից հետո, երբ նա ծանոթացել է իր դեմ սկսված տեղեկատվական արշավին՝ թե ինչպես են իր հետ աշխատածները հերթով իրեն դավաճան համարում։
Մի կարճ հատված ներկայացնեմ նրա մասին հոդվածներից մեկից, որպեսզի հասկանաք տիրող իրավիճակի աբսուրդը․ «Նախկին կայսրության ներսում կարիերա կառուցելով՝ Մեհդիևը երբեք չկարողացավ ազատվել բոլշևիկյան մտածելակերպից։ Նրա կոչումային առաջխաղացումը որոշվեց ոչ թե անձնական որակներով կամ կարողություններով, այլ խարդավանքներով։ Այս մարդու իրական դեմքը, որը հայտնի էր որպես խարդավանքների վարպետ, հատկապես պարզ դարձավ Ադրբեջանի անկախությունը վերականգնելուց հետո։ Մեհդիևը խաղաց «տրոյական ձիու» դեր երկրի անկախ քաղաքականության դեմ՝ օգտագործելով իր պաշտոնական լիազորությունները կայսրության շահերին ծառայելու համար։ Այդ նպատակով նա նույնիսկ դավաճանեց Մեծ առաջնորդ Հեյդար Ալիևին, որը մի ժամանակ նրան նշանակել էր այս պաշտոնում․․․
Կարդացեք նաև
Ակնկալվում էր, որ 80 տարեկանից բարձր Մեհդիևը իր կյանքի մնացած մասը կանցկացնի խաղաղ՝ իր հայ կնոջ և թոռների հետ և առնվազն այս կերպ, առաջին անգամ, օգուտ կբերի Ադրբեջանին։ Սակայն, ինչպես պարզվեց, դավաճանությունը հիվանդություն է․ Մեհդիևի օրինակը ևս մեկ անգամ ցույց է տալիս դա։ Զգալով իրեն «աքսորյալ Նապոլեոն»՝ նա շարունակեց իր դավաճանական առաքելությունը։ Ըստ առկա տեղեկությունների՝ նա հաղորդագրություններ էր գրում օտարերկրյա հետախուզական ծառայություններին և կոչ էր անում պետական հեղաշրջման Ադրբեջանում։ Սա նրա ձերբակալության հիմնական պատճառն էր»։
24 տարի «տրոյական ձի» լինես ու ոչ մեկը չհասկանա, դառնաս 87 տարեկան, նոր գլխի ընկնեն, բա ճնշում էլ կբարձրանա դրանից, առողջականն էլ չի դիմանա:
