«Միասնության Թևեր» քաղաքական նախաձեռնության հիմնադիր անդամ Դավիթ Անանյանի ֆեյսբուքյան գրառումը
Քաղաքական դաշտում այսօր առավել քան երբևէ նկատելի է ոչ քաղաքակիրթ մրցակցության տրամաբանությունը: Կարծես տիրում են «առանց կանոնների մարտերի» օրենքները։ Սա մտահոգիչ է, քանի որ եթե իշխող կուսակցության և նրա ղեկավարի խոսույթում ու վարքագծում նման սանձարձակ ու անհանդուրժողական վարքագիծն արդեն դարձել է բնորոշ, ապա ընդդիմադիր ճամբարում նույն ձևաչափով շարժվելը անթույլատրելի է։ Ընդդիմադիր ուժերը չպետք է իրար հարվածեն, այլ պարտավոր են պահպանել նվազագույն քաղաքական կանոններ և կոռեկտություն։
Օրինակ, հանրային ջանքերով ձևավորված և որոշակի ռեսուրսներ կուտակած ազգային շարժումները չպետք է ցուցադրական համեմատությունների միջոցով նսեմացնեն նոր ուժերին։ Նույնպես՝ նախկին նախագահներին հարող խոսափողները չպետք է թույլ տան անհարգալից արտահայտություններ ընդդիմադիր դաշտում գործող մյուս ուժերի հասցեին։ Նման վարքագիծը վտանգում է միասնական պայքարի հնարավորությունն ու ձևավորում է անհանդուրժողականության մթնոլորտ` կասկածի տակ դնելով ներքին համախմբում քարոզելու նրանց անկեղծությունը։
«Միասնության Թևեր» քաղաքական նախաձեռնության դիրքորոշումն այս հարցում միանշանակ է։ Մեր քաղաքական պայքարի միակ՝ քաղաքական, գաղափարական, արժեքային և ինքնութենական հակառակորդը «Քաղաքացիական պայմանագիր» կուսակցությունն է և դրան հարող արբանյակ ուժերը։ Նրանց իշխանազրկումն է մեր պայքարի վերջնանպատակը։ Մնացած ուժերը մեզ համար քաղաքական մրցակիցներ են, որոնց հետ կարելի է բանակցել ու երկխոսել:
Կարդացեք նաև
Մենք հստակ հայտարարել ենք, որ Հայաստանի 1-ին, 2-րդ և 3-րդ նախագահների և նրանց կուսակցությունների հետ նախընտրական որևէ դաշինք չենք կազմելու։ Այդ դիրքորոշումը պայմանավորված է ոչ միայն մարտավարական, այլև խորապես քաղաքական և գաղափարական նկատառումներով, որոնք բազմիցս ներկայացվել են հանրությանը։
Քաղաքական համախմբումը մեզ համար կարևորագույն արժեք է։ Բայց այն չպետք է դառնա ինքնանպատակ: Համախմբումը պետք է լինի հստակ, արժեհամակարգային և նպատակահարմար։ Միայն այդպես կարելի է խուսափել ներքին ջլատումից և իրականացնել մեր ազգանվեր առաքելությունը՝ հեռացնել հիմնական և միակ քաղաքական հակառակորդին։
