ԱԺ փոխնախագահ Ռուբեն Ռուբինյանը խորհրդարանում լրագրողների հետ ճեպազրույցում անդրադարձավ մամուլի հրապարակմանը, որ «Մեր ձեւով» շարժման վերջին հանրահավաքը հիստերիայի մեջ է գցել իշխանությանը։ «Դե մամուլին որ տեսնեք, կասեք, որ հիստերիայի մեջ ինքն է»,- ասաց Ռուբինյանը։
Նա հարցադրում արեց՝ ինչո՞ւ պետք է իրենց անհանգստացնի ինչ-որ մեկի հանրահավաքը։ «Ինձ ուրախացնում է, որ մեր երկրում քաղաքական ուժերը կարողանում են անել հանրահավաք, եւ, ի տարբերություն այլ տարիների, այդ հանրահավաքի ժամանակ դիմակավորված ուժայինները չեն գալիս ծեծում եւ սպանում այդ հանրահավաք անողներին»,- ասաց նա։
Հարցին, թե հանրահավաքի 30 հազար մասնակիցների թիվն իրենց չի՞ անհանգստացնում, Ռուբինյանը պատասխանեց․ «Ոչ, 7500 թիվն ինձ չի անհանգստացնում։ Դե հիմա ես հակված եմ հավատալ ավելի հարգված կազմակերպությունների։ Բայց ասեմ ձեզ՝ նույնիսկ եթե 30 հազար լինի, չէ, չի անհանգստացնում։ Մեր երկրում իշխանությունը ձեւավորվում է ընտրությունների միջոցով, ժողովուրդը 2026 թվականին ում կուզի, կընտրի»։
Մանրամասները՝ տեսանյութում
Կարդացեք նաև
Հարցին, եթե «Մեր ձեւով» շարժումը չի անհանգստացնում իշխանություններին, ինչո՞ւ մեկ արտահայտության համար Սամվել Կարապետյանը կալանավորվեց, Ռուբեն Ռուբինյանը նման պատասխան տվեց․ «Բայց ո՞վ ասաց, որ Սամվել Կարապետյանը մեկ բառի համար է ձերբակալվել։ Եթե դուք պնդում եք անում, որ մեկ բառի համար է ձերբակալվել, նշանակում է, որ դուք պնդում եք անում, որ անմեղ մարդուն իրավապահ համակարգը ձերբակալել է։ Դա անմեղության կանխավարկածի խախտում է։ Մեղադրանք է առաջադրվել տվյալ անձին իշխանազավթման հոդվածով, որովհետեւ իրավապահ մարմինները եւ դատարանը համարել են, որ իր խոսքերը բավարար են կասկած հարուցելու համար, որ մեղադրանքն իրական է»։
Ամբողջական տեսանյութը՝ այստեղ
Ռոզա ՀՈՎՀԱՆՆԻՍՅԱՆ
