ԱՄՆ շախմատային մայրաքաղաք Սենթ-Լուիսում այսօր հայտնի կդառնան տղամարդկանց եւ կանանց չեմպիոնների ու մրցանակակիրների անունները:
Հայաստանի կանանց ազգային հավաքականի նախկին անդամ Աննա Սարգսյանը, որը բնակության վայրը փոխելուց հետո առաջին անգամ է մասնակցում Միացյալ Նահանգների առաջնությանը, 10 տուրից հետո 6,5 միավորով բաժանում է 2-ից 4-րդ հորիզոնականները: Նա ընդամենը կես միավոր է զիջում առաջատար Կարիսսա Յիպին եւ այսօր խաղալու է նույնպես մրցանակային տեղի հավակնող Ալիս Լիի հետ:
Տղամարդկանց մրցաշարում Լեւոն Արոնյանը 6,0 միավորով «մաքուր» երրորդ տեղում է: Ճիշտ է, 7,5 միավոր վաստակած միանձնյա առաջատար Ֆաբիանո Կարուանային նա այլեւս չի կարող շրջանցել, սակայն նրանց այսօրվա դիմակայությունը շատ բան կարող է պարզել մեդալների հարցում:
Աշոտ ՀԱԿՈԲՅԱՆ
