«Ամբողջ իմաստը կայանում է նրանում, որ այդ չորրորդ հանրապետությունը ստեղծելու ընթացքում պոկեն Սփյուռքը՝ որպես հայոց իրականության կարեւոր մաս, հզոր ուժ։ Նույն կոնտեքստն է նաեւ եկեղեցու հետ կապված՝ էլի պոկել, որովհետեւ Նիկոլ Փաշինյանն ինչ էլ անի, չի կարող եկեղեցու մեջ այն իրավիճակը ստեղծել, որն ինքն ուզում է»,- խորհրդարանում լրագրողների հետ ճեպազրույցում ասաց ՔՊ-ից հեռացված պատգամավոր Հովիկ Աղազարյանը։
Նա նշեց, որ այս թերությունները, որոնք այսօր մատնանշում է Նիկոլ Փաշինյանը, վաղուց կան։ «Վարչապետն այդ մասին գիտեր նաեւ 5 տարի առաջ, 6 տարի առաջ, ինչո՞ւ այն ժամանակ չէր արվում։ Այն ժամանակ չէր արվում, որովհետեւ դրա նպատակահարմարությունը չկար, էսօր անհրաժեշտութունը կա՝ այդ խնդիրը լուծել։ Եվ լավագույն դեպքում վարչապետն իր համար կհասնի եկեղեցու պառակտմանը։ Այսինքն՝ նորից կտարանջատի Սփյուռքը եւ կամփոփովի մեր «իրական Հայաստանի» մեջ, որտեղ իրենք ուզում են սեւեռուն գաղափարը, որը կոչվում է չորրորդ հանրապետություն»,- ասաց Աղազայանը։
Նա նշեց,որ Նիկոլ Փաշինյանն իրավունք չունի կաթողիկոսի հեռացման կոչով հանդես գալ։ Ըստ Աղազարյանի՝ այս ամենն արվում է չորրորդ հանրապետության սեւեռուն գաղափարն իրականացնելու համար։ Իսկ չորրորդ հանրապետությունը, նրանց ծրագրի համաձայն, պետք է ունենա Հայաստանի եկեղեցի, որը 100 տոկոսով պետք է ենթարկվի իշխանությանը։
«Եթե 2026 թվականին ՔՊ-ն հաջողություն արձանագրի, ապա ինքը կարող է Սահմանադրությունը փոխել, նույնիսկ մեր հարեւան թշնամական պետությունների կողմից մեզ ներկայացված պահանջները կատարել, ինքը կարա զինանշանը փոխի, օրհներգը փոխի։ Եվ երեք-չորս տարի հետո պատմաբանները կասեն, որ սա չորրորդ հանրապետության սկիզբն է։ Ինքն ուզում է վերացնել երրորդ հանրապետությունը եւ ստեղծել չորրորդը։ Խնդիրներն այստեղ են, եւ այդ ճանապարհին, թե մենք ինչ մարտահրավերների առաջ կկանգնենք․․․»,- հավելեց նա։
Կարդացեք նաև
Ռոզա ՀՈՎՀԱՆՆԻՍՅԱՆ
