Երեկ ՀՀ Քննչական կոմիտեն հաղորդագրություն տարածեց այն մասին, որ Շիրակի մարզային քննչական վարչությունում նախաձեռնված քրեական վարույթի նախաքննության ընթացքում առերևույթ փաստական տվյալներ են ձեռք բերվել այն մասին, Գյումրու համայնքապետարանի պաշտոնատար անձինք մի շարք աշխատակիցների ցուցում են տվել, որպեսզի վերջիններս հրահանգավորեն իրենց ենթակայության ներքո գտնվող մանկապարտեզների տնօրեններին՝ սաներին տուն ուղարկել և իրենց անձնակազմի հետ անմիջապես մեկնել համայնքապետարան՝ թույլ չտալու ձերբակալել համայնքի ղեկավարին:
Չորս անձի նկատմամբ հարուցվել է հանրային քրեական հետապնդում՝ Քրեական օրենսգրքի 236-րդ հոդվածի 2-րդ մասով (հավաք անցկացնելուն կամ դրան մասնակցելուն խոչընդոտելը կամ հարկադրելը, ինչպես նաև հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելը) և 46-486-րդ հոդվածի 2-րդ մասի 1-ին կետով (մի խումբ անձանց կողմից նախնական համաձայնությամբ արդարադատության իրականացմանը կամ գործի քննությանը միջամտելուն դրդելը) և համայնքապետարանի երեք աշխատակից ձերբակալվել է:
Պարզվում է Գյումրու համայնքապետարանի ձերբակալված երեք աշխատակիցներն էլ կանայք են, երեքն էլ կրթության բաժնից են, ժամանակավոր պաշտոնակատարներ են։
Նրանցից Անահիտ Գասպարյանն ու Բելլա Ավագյանը գլխավոր մասնագետի ժամանակավոր պաշտոնակատարներ են, իսկ Վարդուհի Փիլոյանն՝ առաջատար մասնագետի ժամանակավոր պաշտոնակատար։
Կարդացեք նաև
Ի դեպ, Գյումրու համայնքապետարանից մեզ փոխանցեցին, որ Վարդուհի Փիլոյանը ԱԺ ՔՊ-ական պատգամավոր Կարեն Սարուխանյանի զոքանչն է։
Նունե ԱՐԵՎՇԱՏՅԱՆ
