Հովհաննավանքում այսօր կարգալույծ հռչակված «տեր Արամի»՝ Ստեփան Ասատրյանի հրավիրած «պատարագին» մեծ թվով ՔՊ-ականներ են գալիս, ինչպես նաեւ ՔՊ աջակիցներ:
Հովհաննավանք է եկել նաեւ Դիլիջանի համայնքապետ Դավիթ Սարգսյանը, որը, հիշեցնենք, իր անձնական գործերում սեռի վերաբերյալ «արու» էր նշել:
«Աղոթքի գալուց եկել, հարց եք տալիս, հլը ցածր, ինձ հետ էդ տոնով չխոսես»,- լրագրողի հարցին ագրեսիվ արձագանքեց Սարգսյանը:
Ի՞նչ եկեղեցական տոն է այսօր հարցին, Սարգսյանը չպատասխանեց:
Կարդացեք նաև
«Ես այնքան բան եմ սովորել, որ հիմա ձեզ բան եմ բացատրում: Ձեր նմաններին կարող եմ դաստիարակել: Այնքան կրթություն եմ ստացել, որ երկար ժամանակ փորձես ապրել, չես կարող իմ չափ կրթություն ստանալ»,- այսպես արձագանքեց Սարգսյանը, երբ լրագրողներից մեկը նրանից հետաքրքրվեց, թե տեսե՞լ է իր անձնական գործերում սեռի վերաբերյալ ինչ է գրել:
Դիլիջանի համայնքապետի հետ էր նաեւ Տավուշի մարզպետ Հայկ Ղալումյանը:
«Եկել եմ պատարագի, ժողովուրդ ջան, չեմ պատասխանում ձեր որեւէ հարցի»,-ասաց նա:
Լրագրողի հարցին, թե դժվա՞ր է Նիկոլ Փաշինյանի քավորը լինել, ինչքան սեւ գործ կա, իրեն մասնակից է դարձնում, պարոն Ղալումյանն այսպես արձագանքեց.
«Ոչ, ես չեմ պատասխանում հարցերի: Եկել եմ պատարագի»:
Մեկ այլ հարցին, թե վեհարանը վեհափառից ազատագրելու գործընթացին մասնակցելո՞ւ է, Հայկ Ղալումյանն պատասխանեց՝ բոլոր գործընթացներին է մասնակցելու. «Ես այդ քաղաքական թիմի անդամ եմ: Մայր Աթոռին ընդդեմ որեւէ բան չկա, դա ձեր մեկնաբանությունն է: Ձեր նպատակը ո՞րն է, որ սադրող հարցադրումներ անեք, հունից դուրս գա՞մ»:
Հիշեցնենք, որ կարգալույծ հռչակված «տեր Արամի»՝ Ստեփան Ասատրյանի, հրավիրած «պատարագին» ներկա է լինելու վարչապետ Նիկոլ Փաշինյանը, ինչի համար այսօր վաղ առավոտից տարածքում աշխատում են ոստիկանները: Նրանք իրականացնում են ուժեղացված հսկողություն:
Արփինե ՍԻՄՈՆՅԱՆ
