Բավականին վրդովեցնող նյութ էր, այդ աստիճան տարածումը սոցիալական ցանցերում անընդունելի պետք է համարել: Խոսքը վերաբերում է անձնական կյանքի պաշտպանությանը,- այսօր Ազգային ժողովում լրագրողների հետ ճեպազրույցում անդրադառնալով արքեպիսկոպոսներից մեկին վերագրվող տեսանյութին՝ մեկնաբանեց ԱԺ Պետական իրավական հարցերի մշտական հանձնաժողովի նախագահ Վլադիմիր Վարդանյանը:
-Ինչ եղանակով, երբ հայտնվեց այդ նյութը ու ինչ եղանակով տարածվեց՝ իրավապահ համակարգի գործունեության մաս պետք է կազմի: Հաշվի առնելով հասարակության մեջ կանանց թիրախավորման դեպքերը՝ շատ ավելի վտանգավոր կարող է դիտարկվել այս երեւույթը: Զարմանում էի՝ կանայք են նաեւ տարածում այդ նյութը,- ասաց Վարդանյանը:
Կարդացեք նաև
ՔՊ-ական պատգամավոր Արթուր Հովհաննիսյանն էլ չբացառեց, որ առաջիկայում նոր տեղեկություններ կարող են տարբեր աղբյուրներից հայտնել համացանցում.
-Տարիներ շարունակ բազմաթիվ պատմություններ կան հոգեւորականների կենցաղի ու անձնական կյանք ունենալու վերաբերյալ: Հասել ենք մի փուլ, որ հենց եկեղեցու ներսում գտնվող հոգեւորականներն էլ են սկսել խոսել ու տարբեր պատմություններ պատմել: Գոյություն ունեցող երեւույթների մասին չի բացառվում, որ առաջիկայում այլ փաստական հանգամանքներ հայտնվեն տարբեր մարդկանց մոտ եղած համացանցում ու դառնան հանրության քննության առարկա: Ես խորը վիշտ կունենամ, եթե նման տեսանյութեր էլի տարածվեն հոգեւորականների մասին,- հավելեց Հովհաննիսյանը:
Արփինե ՍԻՄՈՆՅԱՆ
