«Մենք Վաղարշապատում պարոն Մեխակյանի գլխավորությամբ գնում ենք ընտրությունները հաղթելու ճանապարհով։ Մենք վստահ ենք, որ Վաղարշապատի բնակչության 50+1 տոկոսն ընտրելու է պարոն Մեխակյանին։ Քարոզարշավի առաջին 9 օրն ամփոփել ենք, եւ մեր բոլորի տպավորությունն այդպիսին է՝ քաղաքացիները ջերմ դիմավորում են պարոն Մեխակյանին ու մեր թիմին»,- Ազգային ժողովում լրագրողների հետ ճեպազրույցում ասաց ՏԿԵ նախարար Դավիթ Խութադյանը։
Անդրադառնալով քարոզարշավին իր մասնակցությանը՝ Խուդաթյանն ասաց․ «Ինչ վերաբերում է այն ձեւակերպմանը, թե ինչ եմ անում ես կամ մամուլում գտած այն ձեւակերպմանը, որ կաշվից դուրս եմ գալիս, ինձ համար առանցքային կարեւորություն է ՔՊ կուսակցության ցանկացած թեկնածուի հաղթանակը։ Եվ ես փորձում եմ նպաստել այդ հաղթանակին, իհարկե, օրենքով սահմանված կարգով։ Եվ այդ նպատակով նաեւ երկուշաբթի օրվանից արձակուրդում եմ լինելու երկու շաբաթ, որպեսզի միանամ Վաղարշապատում քարոզարշավ իրականացնող մեր թիմին»։
Հարցին, թե ինչո՞ւ դահլիճային հանդիպումներին թույլ չեն տվել մասնակցել լրատվամիջոցներին՝ Խուդաթյանն ասաց, որ իրենք դահլիճի դռներ չեն փակել, երկու լրատվամիջոց է ներկա եղել հանդիպմանը, երկուսն էլ հնարավորություն են ունեցել լուսաբանել միջոցառումը։
Կարդացեք նաև
Անդրադառնալով հարցին, թե ինչպե՞ս են վստահ պնդում, որ հաղթելու են, Գյումրիում ու Փարաքարում ՔՊ-ն հաղթանակ չտարավ, ՏԿԵ նախարարը պատասխանեց, որ իրենք էլ հաղթել են եւ Խոյում, եւ Վաղարշապատում։ Ըստ նրա՝ ընդդիմությունը վերջին մի քանի ընտրություններում պարտվել է Խոյում ու Վաղարշապատում եւ վստահաբար պարտվելու է նաեւ այս անգամ Վաղարշապատում։
Հնարավոր կոալիցիաներ կազմելու մասին հարցին էլ Խուդաթյանը պատասխանեց․ «Մենք ընտրություններին գնում ենք 50+1 ձայներ ստանալու՝ առանց կոալիցիայի համայնքում իշխանություն ստանձնելու»։
Մանրամասները՝ տեսանյութում
Ռոզա ՀՈՎՀԱՆՆԻՍՅԱՆ
