Շուրջ 12 օր է, ինչ Վարդան Ղուկասյանը գտնվում է ազատությունից զրկված վիճակում՝ առանց որևէ գործող դատական կամ իրավական ակտի․ հայտարարություն

Գյումրու քաղաքապետ Վարդան Ղուկասյանի հայտարարությունը

ՀՀ դատախազին
ՀՀ մարդու իրավունքների պաշտպանին

2025 թվականի հոկտեմբերի 21-ից թիվ 62305025 քրեական վարույթի շրջանակներում քննչական մարմնի միջնորդության հիման վրա, ՀՀ հակակոռուպցիոն դատարանի կողմից կայացվել էր որոշում՝ Վարդան Ղուկասյանի նկատմամբ կիրառելու խափանման միջոց կալանք։
Այնուհետև, հենց նույն վարույթի շրջանակներում, նույն մարմնի՝ ՀՀ հակակոռուպցիոն կոմիտեի քննչական խմբի ղեկավարը կայացրել է նոր որոշում, որով պարոն Վարդան Ղուկասյանի նկատմամբ ընտրվել է այլընտրանքային համակցված խափանման միջոց՝
պաշտոնավարման կասեցում և Հայաստանի Հանրապետությունից բացակայելու արգելք։

Նշված որոշումն ընդունվել է 2025 թվականի հոկտեմբերի 21-ին և նույն օրը հաստատվել է վարույթի նկատմամբ հսկողություն իրականացնող դատախազ Գորիկ Հովակիմյանի կողմից։

Կարդացեք նաև

«Գյումրիում ՔՊ-ն մեծամասնություն կազմելու ոչ նպատակ ունի, ոչ էլ պատկերացում, թե ինչ ձեւով կարելի է այդ մեծամասնությունը կազմել»․ Շիրակի մարզպետ

• 15:06 31.10.2025

Զորակցում եմ բոլոր նրանց, ովքեր հայտնվել են շինծու մեղադրանքների թիրախում և դատապարտում եմ նրանց դեմ իրականացվող ապօրինի քրեական հետապնդումը. Վարդան Ղուկասյան

• 19:15 30.10.2025

Հետապնդումների պատճառները քաղաքական են

• 10:00 30.10.2025

Այնուամենայնիվ, որոշումը պաշտպանական կողմին տրամադրվել է միայն ութ օր անց, ինչն ինքնին խախտում է պաշտպանական իրավունքի իրացման երաշխիքները և փաստացի հետաձգել է պարոն Ղուկասյանի ազատ արձակման գործընթացը։
Նշված հանգամանքներից բխում է, որ 2025 թվականի հոկտեմբերի 21-ից սկսած, այսինքն՝ նոր այլընտրանքային խափանման միջոցի ընտրության պահից, պարոն Վարդան Ղուկասյանի նկատմամբ ընտրված խափանման միջոց կալանքը դադարել է ունենալ իրավական ուժ և հիմք։
Քննչական մարմնի նոր որոշմամբ ընտրված խափանման միջոցը փոխարինել է կալանքը, և այդ պահից սկսած՝ կալանքի մեջ պահելը հանդիսանում է անհիմն և ապօրինի ազատազրկում։

Այսինքն, արդեն շուրջ 12 օր է, ինչ պարոն Ղուկասյանը փաստացի գտնվում է ազատությունից զրկված վիճակում՝ առանց որևէ գործող դատական կամ իրավական ակտի, որը կնախատեսեր այդ սահմանափակման օրինականությունը։

Պարոն Ղուկասյանի պաշտպանական խումբը վերոնշյալ որոշման մասին տեղեկանալուց անմիջապես հետո դիմել է ՀՀ գլխավոր դատախազ տիկին Աննա Վարդապետյանին, ինչպես նաև այլ իրավասու մարմինների՝ մատնանշելով այս անօրինականությունը։

Ստեղծված իրավիճակը ակնհայտորեն վկայում է այն մասին, որ Հայաստանի Հանրապետության անունից գործող որոշ պաշտոնատար անձինք կամ չեն տիրապետում քրեադատավարական նորմերին և իրավական պետության սկզբունքներին կամ դիտավորությամբ խեղաթյուրում են արդարադատության բուն էությունը՝ չարաշահելով իրենց իշխանությունը և ոտնահարելով անձի հիմնարար իրավունքները։

Հարգելի տիկնայք,

Եթե չեք տիրապետում քրեադատավարական կարգավորումներին, ապա հարկ ենք համարում հիշեցնել, որ համաձայն ՀՀ քրեական դատավարության օրենսգրքի պահանջների, կալանքը որպես խափանման միջոց կարող է կիրառվել միայն այն դեպքում, երբ այլընտրանքային խափանման միջոցների կիրառումը անբավարար է` անհնար է։

Մինչդեռ պարոն Վարդան Ղուկասյանի պարագայում, 2025 թվականի հոկտեմբերի 21-ից առկա է օրինական ուժ ունեցող որոշում, որով նրա նկատմամբ ընտրվել է այլընտրանքային համակցված խափանման միջոց՝ պաշտոնավարման կասեցում և բացակայելու արգելք, ինչը բացառում է կալանքի հետագա կիրառման իրավաչափությունը։

Հետևաբար, պարոն Ղուկասյանի կալանքի շարունակական պահպանումը հակասում է ոչ միայն ՀՀ օրենսդրությանը, այլև մարդու հիմնարար իրավունքներին և իրավական պետության սկզբունքներին։

Հաշվի առնելով վերը նշվածը՝ պահանջում ենք անհապաղ դադարեցնել պարոն Վարդան Ղուկասյանի ապօրինի կալանքը և անմիջապես ապահովել նրա ազատ արձակումը։

ՎԱՐԴԱՆ ՂՈՒԿԱՍՅԱՆԻ ՊԱՇՏՊԱՆԱԿԱՆ ԽՈՒՄԲ