«Այս պահի դրությամբ, ունենք նախնական տվյալներով սպանություն։ Երեխայի հայրը, խեղդամահ անելու ճանապարհով, սպանել է փոքրիկին։ Այս պահի դրությամբ՝ այլ տվյալ հանրայնացնել կխուսափեմ»,- լրագրողների հետ զրույցում ասաց ՆԳ նախարար Արփինե Սարգսյանը՝ անդրադառնալով Գեղարքունիքի մարզի Ծափաթաղ գյուղի բնակիչ 3-ամյա Տիգրան Օվանեսովի հետ կատարվածին։
Նա շեշտեց՝ այս վարկածն, ի թիվս այլնի, առաջին օրվանից եղել է իրենց ուսումնասիրության շրջանակներում։
Լրագրողները հետաքրքրվեցին՝ ի՞նչ է ասել երեխայի հայրը, Արփինե Սարգսյանը պատասխանեց․ «Կհիշեք՝ երեխայի եղբայրը, որն ուներ որոշակի առողջական խնդիրներ, պարբերաբար ռեակցիաներ էր տալիս (խոսել չկարողացող երեխան կոկորդն է ցույց տվել.-խմբ.)։ Ներգրավել էինք նաև համապատասխան մասնագետ, որ հոգեկան առողջության վիճակի վրա լրացուցիչ ծանրություն՝ որպես այդպիսին չառաջանա և կարողանանք պատշաճ կերպով ստանալ տեղեկություններ փոքրիկից, եթե որևէ բան հայտնի է։ Այս պահի դրությամբ շատ նախնական տվյալներով՝ երկու եղբայրները դուրս են եկել տնից, հորն են հանդիպել, և հայրը խեղդելու ճանապարհով երեխայի կյանքին վերջ է տվել։ Երեխայի հայրը նշել է, որ ներընտանեկան որոշակի հարցադրման շրջանակներում է վրա հասել դեպքը։ Խնդրում եմ, որ մենք պատշաճ կերպով գնահատենք իրավիճակը։ Այս պահի դրությամբ՝ այլ տվյալ հանրայնացնել չեմ կարող»։
Արփինե Սարգսյանը նաև մանրամասնեց՝ երբ դեպքը տեղի է ունեցել, և սկսել են որոնողափրկարարական աշխատանքները, ամբողջ հարակից հատվածով իրականացվել է տարածքի չակերտավոր սանրում․ «Յուրաքանչյուր հաջորդ անցնելու պայմաններում, ըստ երեխայի հոր նախնական ցուցմունքի՝ նա երեխայի մարմնի տեղափոխություն է իրականացրել»։
Կարդացեք նաև
Արփինե Սարգսյանն ասաց, որ այս ընտանիքի թեման կոմունիկացվել է նաև տարածքային միասնական սոցիալական ծառայության հետ, որ ընտանիքում բնակվող մնացյալ երեխաների մասով կոնկրետ որոշումներ կայացվեն և ընթացք տրվի։
Արփինե Սարգսյանի ճեպազրույցն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
