Նիդեռլանդական օրագիր . Նիդեռլանդների Ալմելո քաղաքի ավագանու անդամ, համայնքային ակտիվ գործիչ և հայկական շահերի պաշտպան Ռոբին Հայկ Գելիջին հանդես է եկել ավելի խիստ հայտարարությամբ՝ արձագանքելով Հաագայում Հայաստանի դեսպանության պասիվ աշխատանքին և համայնքի հետ կապի բացակայությանը։
Գելիջին առանձնապես ընդգծել է, որ իր քննադատությունը հասցեագրված չէ Հայաստանի կառավարությանը, այլ միայն ու միայն դեսպանության ոչ պատշաճ աշխատանքին, որը, ըստ նրա, վնասում է սփյուռքի հետ կապերին և խորացնում է օտարացումը։
Գելիջին հաստատել է, որ վերջին ամիսներին մի քանի պաշտոնական նամակներ է ուղարկել դեսպան Վիկտոր Բիյագովին, սակայն որևէ բովանդակային պատասխան չի ստացել՝ միայն «լռություն և խուսափում»։
«Այս փուլում ոչ ոք չի կարող ինձ ասել, որ ժամանակ չկա հանդիպումների կամ համայնքի հետ երկխոսության համար։
Կարդացեք նաև
Ես տեսել եմ տեսագրություններ, լուսանկարներ և հրապարակումներ, թե ինչպես է դեսպանը ժամանակ գտնում յոգայի դասերի, միջոցառումների և այլ անձնական զբաղմունքների համար։ (տեսանյութը՝ կից)
Եթե յոգայի համար ժամանակ կա, ապա պետք է լինի ժամանակ նաև սեփական համայնքի համար, որի անունով պաշտոն ես զբաղեցնում», — նշել է Գելիջին։
Գելիջին նաև զգուշացրել է, որ դեսպանությունը միտումնավոր կերպով աշխատում է համայնքը մասնատելու ուղղությամբ․
«Դեսպանությունն իրականում գործում է միայն մի կոնկրետ միության հետ։
Սակայն այդ միությունը որևէ կերպ չի ներկայացնում ամբողջ համայնքը։
Նիդերլանդահայ համայնքը լայն է, բազմաշերտ և բազմազան։
Հնարավոր չէ մեկ կազմակերպություն ընտրել և ձևացնել, թե այն խոսում է բոլորի անունից։
Սա դիվանագիտություն չէ։
Սա փաստերի խեղաթյուրում է և համայնքի վրա վերահսկողություն սահմանելու վտանգավոր փորձ»։
Նա կրկին ընդգծել է, որ իր դիրքորոշումը ոչ թե կառավարության դեմ է, այլ՝ պատասխանատվության բացակայության։
«Ես միշտ եղել եմ Հայաստանի կողքին։
Իմ խոսքերը կառավարության դեմ չեն ուղղված։
Իմ մտահոգությունը վերաբերում է դեսպանության վարքագծին։
Համայնքի անտեսումը, ընտրովի կապերը և լռությունը դիվանագիտություն չեն։
Դա պարզապես վախ է պատասխանատվությունից։
Եվ հենց այդպես է կորցվում սփյուռքը՝ ոչ թե քաղաքականությամբ, այլ անտարբերությամբ»։
Գելիջին նշել է, որ նիդեռլանդահայ մի շարք կազմակերպություններ իրեն անձամբ և հրապարակային հայտնել են, որ իրենք նույնպես չեն ստացել որևէ արձագանք դեսպանությունից։
«Ես խոսում եմ միայն իմ անունից։
Բայց իրականությունն այն է, որ վերջին օրերին ստացել եմ տասնյակ նամակներ և հաղորդագրություններ համայնքից՝ նույն մտահոգությամբ։
Այս լռությունը այլևս չի աշխատում»։
Գելիջին հայտնել է, որ առաջիկա օրերին պատրաստվում է հանրայնացնել իր տրամադրության տակ եղած տեսանյութերն ու վկայությունները, որոնք ցույց են տալիս՝ ինչպես է դեսպանությունը հետևողականորեն անտեսում համայնքի հարցերը։
«Ես ունեմ փաստեր։
Եվ եթե բաց երկխոսություն չլինի, այդ փաստերը կհրապարակվեն լրատվամիջոցներով։
Ես արդեն կապ եմ հաստատել մի քանի հեղինակավոր հայկական լրատվամիջոցների հետ»։
Նա նաև նշել է, որ եթե առաջիկայում չլինեն իրական քայլեր և պատասխանատվություն, ինքը հարցը կներկայացնի Նիդեռլանդների խորհրդարանի պատգամավորներին և Եվրոպական խորհրդարանի անդամներին։
«Ես պատասխանատվություն կրելուց չեմ վախենում։
Իմ նպատակը Հայաստանի անունը պաշտպանելն է, ոչ թե հակադրվել կառավարությանը։
Հարցն այժմ դեսպանության թափանցիկությունն ու ազնվությունն է։
Ես մշտապես պաշտպանել եմ Հայաստանի անունը և կշարունակեմ դա անել։
Բայց լռությունն ու խուսափելը չեն կարող լինել պաշտոնական քաղաքականություն», — եզրափակել է Գելիջին։
Ռոբին Հայկ Գելիջի
Ալմելո քաղաքի ավագանու անդամ
