Թուրքիայում գործող «Gündemar Araştırma» հետազոտական ընկերությունը հնարավոր ընտրությունների վերաբերյալ սոցհարցում է իրականացրել:
Հոկտեմբերին անցկացված սոցհարցման մասնակիցներին ուղղվել է հետևյալ հարցը՝ «Եթե այս կիրակի խորհրդարանական ընտրություններ լինեն, ո՞ր կուսակցության օգտին կքվեարկեք»։ Պատասխանների արդյունքներից պարզ է դարձել, որ Թուրքիայում իշխող կուսակցությունը զիջող դիրքերում է հայտնվել: Ըստ այդմ՝ իշխող «Արդարություն և զարգացում» կուսակցության (ԱԶԿ-AKP) օգտին պատասխանել է մասնակիցների 29.09%-ը, իսկ գլխավոր ընդդիմադիր ուժ համարվող «Ժողովրդահանրապետական» կուսակցության (ԺՀԿ-CHP) օգտին՝ 35.25%-ը:
Սոցհարցման շրջանակներում անդրադարձ է արվել նաև Թուրքիայի նախագահական ընտրություններում հնարավոր 2-րդ փուլի անցկացմանը: Այս հարցում էլ «ԱԶԿ»-ի առաջնորդ և Թուրքիայի նախագահ Ռեջեփ Թայիփ Էրդողանն է ցածր ցուցանիշներ հավաքել՝ զիջելով «ԺՀԿ»-ական հնարավոր մրցակիցներին:
Հատկապես ընդգծվում է, որ բացի կալանավորված Ստամբուլի նախկին քաղաքապետ Էքրեմ Իմամօղլուից և «ԺՀԿ» առաջնորդ Օզգյուր Օզելից Էրդողանը զիջում է նույնիսկ Անկարայի քաղաքապետ Մանսուր Յավաշին:
Կարդացեք նաև
Սոցհարցման մասնակիցների 60.34%-ն Էրդողանի և Յավաշի միջև ընտրելու պարագայում նախապատվությունը տվել է Յավաշին, 53.40%-ն Էրդողանի և Օզելի դեպքում՝ Օզելին, իսկ 57.97%-ն Էրդողանի և Իմամօղլուի դեպքում՝ Իմամօղլուին:
Թուրքական ընդդիմադիր մամուլում ընդգծվում է, որ Էրդողանը դժվար կացության մեջ է ու արդեն էական էլ չէ, թե ով կլինի նրա մրցակիցը:
Աղբյուր՝ Ermenihaber.am/Kronos
