Այսօր փոխվարչապետ Տիգրան Խաչատրյանը մասնակցել է Արդյունահանող ճյուղերի թափանցիկության նախաձեռնության (ԱՃԹՆ) Խորհրդի 64-րդ նիստին, որն այս տարի առաջին անգամ անցկացվում է Երևանում:
Խորհրդի նիստին ներկա էին ՀՀ կառավարության, քաղաքացիական հասարակության, հանքարդյունահանող կազմակերպությունների, միջազգային գործընկեր կազմակերպությունների, ԱՃԹՆ միջազգային քարտուղարության և ԱՃԹՆ անդամակից շուրջ 100 երկրների ներկայացուցիչներ:
Իր ողջույնի խոսքում փոխվարչապետը բարձր է գնահատել Հայաստանի և ԱՃԹՆ միջազգային համայնքի շարունակական համագործակցությունը, մասնավորապես՝ Տիգրան Խաչատրյանը նշել է. «ԱՃԹՆ Խորհրդի նիստի անցկացումը Հայաստանում նշանակալի իրադարձություն է՝ որպես Հայաստանի և ԱՃԹՆ միջազգային համայնքի շարունակական համագործակցության երաշխիք։ Հայաստանի անդամակցությունը ԱՃԹՆ-ին ոլորտային նախաձեռնություն լինելուց զատ շատ ավելի ընդգրկուն գործընթացի, այն է՝ բաց, հաշվետու և մասնակցային կառավարման կարևոր բաղադրիչ է։ Մեր անդամակցության առաջին իսկ օրերից ԱՃԹՆ-ն դարձել է գործնական հարթակ՝ պետական ինստիտուտների, քաղաքացիական հասարակության և բիզնեսի միջև բաց երկխոսության ձևավորման և դրա հիմքով իրական փոփոխությունների ապահովման համար»:
Իր ելույթում Տիգրան Խաչատրյանն անդրադարձել է նաև բնական պաշարների արդյունավետ և թափանցիկ կառավարման կարևորությանը. «Այժմ մեր նպատակը տնտեսական ցուցանիշների բարելավմանը զուգահեռ պատասխանատու, բնապահպանորեն անվտանգ և սոցիալապես արդար ոլորտի ձևավորումն է, ինչն առանձնակի կարևորություն է ձեռք բերում էներգետիկ անցմանը զուգահեռ բնական ռեսուրսների, մասնավորապես՝ գունավոր և հազվագյուտ մետաղների նկատմամբ աճող պահանջարկի համատեքստում։ Այս նպատակին է ծառայում 2023 թվականին ընդունված՝ Հայաստանի Հանրապետության հանքարդյունաբերության զարգացման ռազմավարությունը։ Այն ոչ միայն ամրագրում է ԱՃԹՆ անդամակցությունը որպես հանքարդյունաբերության կառավարման համակարգի անբաժանելի մաս, այլև առաջնային է համարում տվյալների բաց, համակարգված և թվային կառավարման միջոցով ԱՃԹՆ ստանդարտի պահպանումն ու ընդլայնումը՝ որպես սոցիալ-տնտեսական զարգացման կարևոր գործիք»։
Կարդացեք նաև
Ամփոփելով ելույթը՝ փոխվարչապետը վերահաստատել է բնական ռեսուրսները ողջ հասարակության զարգացմանը ծառայեցնելու նպատակով թափանցիկ և բաց կառավարման համակարգ ձևավորելու Կառավարության հանձնառությունը:
ԱՃԹՆ Խորհրդի նիստի շրջանակներում կայացել է նաև փոխվարչապետ Տիգրան Խաչատրյանի և ԱՃԹՆ Խորհրդի նախագահ Հելեն Քլարկի առանձնազրույցը:
ՀՀ կառավարություն
