«Մեր ձեւով» շարժման անդամ, փաստաբան Ռուբեն Մխիթարյանն ազատ է արձակվել իրեն մեղսագրվող հանցավոր արարքի հիմնավոր կասկածի բացակայության հիմքով: Այս մասին այսօր լրագրողների հետ հանդիպման ժամանակ ասաց փաստաբան Լիանա Գասպարյանը:
«Հստակ արձանագրվել է, որ բացակայում է հանցավոր արարքի հիմնավոր կասկածը, եթե այդպես չլիներ, նրա նկատմամբ այլ խափանման միջոց կկիրառվեր», ասաց Գասպարյանը: Նրա խոսքով, Մխիթարյանին առաջադրված մեղադրանքի հիմքում մեկ ոստիկանի ցուցմունք է:
Անդրադառնալով Մխիթարյանի՝ ազատ արձակման վերաբերյալ դատարանի որոշումը մեղադրող կողմի բողոքարկելու որոշմանը՝ Գասպարյանն ասաց՝ թող հանգիստ բողոքարկեն. «Մենք այդ բողոքներին պատասխաններ կտանենք, անկախ ամեն ինչից պայքարելու ենք մինչեւ վերջ»:
Կարդացեք նաև
Ռուբեն Մխիթարյանն էլ անդրադառնալով Վարդան Ղուկասյանի ձերբակալության օրվան՝ ասաց իրեն մի հարց է տանջում, եթե կար ձերբակալության որոշում, ինչու նախապես չէին ծանուցել: Նա անդրադարձավ նաեւ ի պաշտպանություն Ղուկասյանի եկած քաղաքացիների նկատմամբ նախաձեռնված հետապնդման գործերին. «Իշխանությունները նման ճանապարհով փորձում են մարդկանց վախեցնել: Խոսքի ազատությունը, հավաքների ազատությունը, որը նախատեսված է մեր օրենքներով, ամբողջովին կարծես պայթեց: Տպավորություն է՝ եթե մի բան խոսես, կարող է քո վրա շատ թանկ արժենա, հասնի նրան, որ կալանավորվես»:
Արփինե ՍԻՄՈՆՅԱՆ
