«Ես եկել եմ այստեղ խոսք հնչեցնելու, դիմացի հիմնարկից պատասխան ստանալու ակնկալիք չունեմ»,-դատախազության մոտ՝ ի պաշտպանություն քաղբանտարկյալների ցույցի ժամանակ ասաց փաստաբան Հովհաննես Խուդոյանը։
Ըստ նրա, ՀՀ իրավական կառույցները դադարել են ՀՀ-ում օրենքը եւ իրավունքը պաշտպանելուց եւ վերածվել են առանձին խմբի քաղաքական նպատակներն ու շահերը պաշտպանողների, դարձել են մարդու իրավունքների դեմ՝ հետեւողական եւ չարամիտ գործող անձանց կողմից համակարգված քաղաքական հետապնդումների գործողությունների մասնակից։
Հովհաննես Խուդոյանն ասաց, որ քաղաքական հետապնդումների մասին խոսելիս պետք է նկատի առնենք մի էական հանգամանք․ դրանք կիրառվում են ոչ միայն քաղաքականությամբ զբաղվող անձանց նկատմամբ, այլ մեծամասամբ նաեւ անձանց դեմ, ովքեր քաղաքական գործունեություն չեն ծավալում, հանուն իշխանության պայքար չեն մղում, բայց անհաշտ են բոլոր անարդարությունների, պետականության հետեւողական կազմաքանդման գործողությունների հետ եւ բարձրաձայն են խոսում այդ մասին։
«Տարբեր տեսակի քարոզիչները հաճախ փորձում են հասարակությանը մոլորեցնել՝ ասելով, որ անձը չի կարող քաղաքական հետապնդման ենթարկվել, որովհետեւ այդ անձը չի զբաղվում քաղաքական գործունեությամբ, չի մասնակցում ընտրություններին, որեւէ կուսակցության անդամ չէ։ Բայց անձի իրավունքների ցանկացած սահմանափակում, որի շարժառիթը քաղաքական է, անձին դարձնում է քաղաքական հետապնդման ենթարկվող եւ քաղբանտարկյալ, եթե անձը ազատազրկված է»,- ասաց նա։
Կարդացեք նաև
Մանրամասները՝ տեսանյութում
Ցույցի մասնակիցները պահանջում են՝ դադարեցնել քաղաքացիների հետապնդումները, ազատ արձակել քաղբանտարկյալներին, դադարեցնել դատարանների նկատմամբ ճնշումները եւ ապահովել դատարանների անկախությունը։
Ամբողջական տեսանյութը՝ այստեղ
Նելլի ԳՐԻԳՈՐՅԱՆ
