Նոյեմբերի 19-ին Եվրոպական հանձնաժողովը ողջունել է Եվրոպական խորհրդարանի եւ Խորհրդի միջեւ ԵՄ տաղանդների շտեմարանի (EU Talent Pool) ներդրման մասին ձեռք բերված նախնական քաղաքական համաձայնությունը։
Գործարկվելուն պես ԵՄ տաղանդների շտեմարանը կդառնա առաջին համաեվրոպական հարթակը՝ նախատեսված ԵՄ-ից դուրս բնակվող աշխատանք փնտրողների շրջանում միջազգային հավաքագրումը հեշտացնելու համար: Տաղանդների շտեմարանին անդամ պետությունների մասնակցությունը կլինի կամավոր հիմունքներով:
Այս նոր հարթակը ԵՄ տարածքում գործող գործատուների համար կհեշտացնի ԵՄ անդամ չհանդիսացող երկրներից աշխատանք փնտրողների նույնականացումը եւ հավաքագրումը՝ ԵՄ-ում աշխատուժի պակասի առջեւ կանգնած մասնագիտությունների համար: Երրորդ երկրներից աշխատանք փնտրողները կկարողանան գրանցել իրենց պրոֆիլները հարթակում եւ ներկայացնել իրենց հմտությունները, որակավորումը, աշխատանքային փորձը եւ լեզուների իմացությունը:
Մասնակից ԵՄ անդամ պետությունների գործատուների թափուր աշխատատեղերը հասանելի կլինեն ԵՄ տաղանդների շտեմարանում, ինչը աշխատանք փնտրողներին հնարավորություն կտա գտնել իրենց հմտություններին համապատասխանող աշխատանքներ։
Կանոնակարգն այժմ պետք է պաշտոնապես ընդունվի Եվրոպական խորհրդարանի եւ Խորհրդի կողմից։
Կանոնակարգի՝ ուժի մեջ մտնելուն պես Հանձնաժողովը կմշակի հարթակը՝ այն հնարավորինս շուտ գործարկելու նպատակով։
EU NEIGHBOURS EAST
