Թալինի տարածաշրջանային հոգևոր հովիվ տեր Թադե քահանա Թախմազյանը նոյեմբերի 21-ին հրավիրվել էր Մայր Աթոռ Սուրբ Էջմիածնի Կարգապահական հանձնախմբի քննարկմանը: Ինչպես կարգալույծ հռչակված Ստեփան Ասատրյանն ու Վարդան Հունանյանը, տեր Թադեն եւս իր ձեռամբ մատուցած պատարագի ժամանակ, որին ներկա էր Նիկոլ Փաշինյանը, չէր հիշատակել Ամենայն Հայոց Կաթողիկոսի անունը:
Aravot.am-ը Մայր Աթոռի տեղեկատվական համակարգի ղեկավար տեր Եսայի քահանա Արթենյանից փորձեց մանրամասներ պարզել՝ ի՞նչ է քննարկվել եւ արդյոք հոգեւորականը կարգալույծ կհռչակվի, ինչպես այդ լուրը շրջանառվում է մամուլում: «Երեկ տեղի ունեցավ կարգապահական հանձնախմբի նիստը, տեր Թադեն ներկայացավ նիստին, հանդիպումը կայացավ, հետագայում արդեն կարգապահական հանձնախումբն իր եզրակացությունը կանի եւ ըստ պատշաճի նաեւ կտեղեկացնի»,- ասաց տեր Եսային:
Մեր դիտակմանը, որ տեր Թադեն եւս կարգալույծ հռչակված քահանաների նման պատարագի ժամանակ չի տվել Վեհափառ Հայրապետի անունը, արդյոք դա ինչ-որ հետեւանք կունենա՞, Մայր Աթոռի տեղեկատվական համակարգի ղեկավարն այսպես արձագանքեց. «Բնականաբար, Վեհափառ Հայրապետի անունը պատարագին չհիշատակելը հակականոնական է, անպայման անդրադարձ կլինի դրան, եւ դա կունենա իր հետեւանքները»:
Հիշեցնենք, որ սեպտեմբերի վերջին տեր Թադեն հայտարարությամբ էր հանդես եկել՝ նշելով, թե միանում է եկեղեցուն դեմ դուրս Հովհաննավանքի նախկին հոգեւոր հովիվ, արդեն կարգալույծ հռչակված Ստեփան Ասատրյանին: Նա նաեւ նշել էր, թե, իբր, եկեղեցու ներսում եղբայրասիրությունը վտանգված է, իսկ ազատ խոսքն՝ անարգված։
Կարդացեք նաև
Գոհար ՀԱԿՈԲՅԱՆ
