37 տարեկան հասակում հիվանդության պատճառով մահացել է «Շիրակ» ֆուտբոլային ակումբի նախկին ֆուտբոլիստ Լի Լամին Յորոն։
Այս մասին տեղեկանում ենք «Շիրակ» ֆուտբոլային ակումբի ֆեյսբուքյան էջից։
Ցավակցություն ու ափսոսանք հայտնելով՝ ակումբը տեղեկացնում է․ «Յորոն «Շիրակի» կազմում դարձել է Հայաստանի չեմպիոն ու գավաթակիր՝ անցկացրած 82 խաղում խփելով 24 գոլ։
Սենեգալցին մեր թիմի կազմում աչքի ընկած լավագույն լեգեոներներից մեկն էր, որն իր խաղով վաստակել էր շիրակցի ֆուտբոլասերի սերն ու հարգանքը»։
Գյումրեցիների հիշողության մեջ Արեւմտյան Աֆրիկայի Սենեգալ պետությունից իրենց ֆուտբոլային ակումբում խաղացող Յորոն կմնա ոչ միայն գյումրու բարբառով խոսող երիտասարդ, որին այս քաղաքի գրեթե բոլոր բնակիչները ճանաչում էին, բարևում, հաճախակի լուսանկարվում նրա հետ, ամեն ինչ անում էին, որ լավ զգա հյուրընկալ այս վայրում (նա էլ իր հերթին շփվում էր շատերի հետ, ապրում այս քաղաքի կյանքով), այլ նրան ընդունում էին որպես գյումրեցու։
Խաղերից մեկի ժամանակ գյումրեցի ֆուտբոլասերները Յորոյին պահանջ էին ներկայացնում՝ բացականչելով. «Ծո, Յորո, Յորո, հլը պրծի մի հատ գոլ խփի, այ տղա, տո դու գյումրեցի չե՞ս, այ Յորո»։
Նունե ԱՐԵՎՇԱՏՅԱՆ
Լուսանկարը՝ «Շիրակ» ֆուտբոլային ակումբի ֆեյսբուքյան էջից:
