-Այսօր եկել ենք քաղաքացիների գումարների հետեւից, եկել ենք պահանջելու այդ շորթված գումարները, որովհետեւ այդ հանցագործությունները տեղի են ունեցել տվյալ պետական մարմինների թերի աշխատանքի արդյունքում,-այսօր Քննչական կոմիտեի շենքի դիմաց լրագրողներին ասաց «Հանրային վերահսկողություն» իրավապաշտպան հասարակական կազմակերպության նախագահ Մհեր Կարագոզյանը:
Նրա խոսքով՝ ՀՀ տարածքում գործել են տարբեր տեսակի ապօրինի ձեռնարկատիրություններ, դրանց մասին վերին օղակներում իմացել, բայց չեն կանխել. «Դրա հետեւանքով ունենք ավելի քան 20.000 տուժածներ: Զանգերի կենտրոնների միջոցով ներդրումային խարդախությունների ու այլ կիբեռհանցագործությունների հետեւանքով քաղաքացիները հայտնվել են ֆինանսական կազուսի առաջ»:
Մհեր Կարագյոզյանն ասաց՝ իրավասու մարմիններին փորձում են հիշեցնել իրենց պարտականությունները, որովհետեւ քաղաքացիները կույր աղիքներ չեն ցանկանում պահել, եթե իրավապահ կառույցները չաշխատեն, քաղաքացիները կփակեն այդ կառույցների դռները. «Հակառակ դեպքում մենք այս դռները կփակենք, մենք պատրաստ չենք կույր աղիքներ պահելու: Մենք պատրաստ չենք հարկեր վճարելու այն դեպքում, երբ որեւէ դեպքում մեր իրավունքները չեն վերականգնվում»:
Կարդացեք նաև
Կարագյոզյանին այսօր քննչական կոմիտեի բակում ընդունեց նաեւ կոմիտեի ներկայացուցիչ Շիրազ Գրիգորյանը, պատասխանեց բարձրացված հարցերին:
Ըստ Գրիգորյանի՝ կոնկրետ զեղծարարությունների դեպքերով քրեական վարույթների շրջանակներում կան բացահայտումներ՝ մեղադրյալներ եւ տուժածների փոխհատուցում: Իսկ թե այդ բացահայտումները իրական զեղծարարությունների քանի տոկոսն են կազմում, պաշտոնյան չասաց:
Արփինե ՍԻՄՈՆՅԱՆ
