Կարեն Դեմիրճյանի թանգարանի տնօրեն Վահագն Մամյանը և ավագ գիտաշխատող Ֆիրդուս Զաքարյանն այցելել են ՀՀ արդարադատության նախարարության «Արմավիր» քրեակատարողական հիմնարկ։ Այցի ընթացքում նրանք ազատազրկված անձանց ներկայացրել են հայրենանվեր գործունեությամբ հայ ժողովրդի հիշողության մեջ առանձնահատուկ տեղ զբաղեցրած պետական գործիչ Կարեն Դեմիրճյանի կյանքի ու գործունեության նոր էջերը։
Այլ քրեակատարողական հիմնարկներում պահվող ազատազրկված անձինք ևս հնարավորություն են ունեցել մասնակցելու հանդիպմանը առցանց ձևաչափով։
Միջոցառման սկզբում ցուցադրվել է Կարեն Դեմիրճյանին նվիրված փաստավավերագրական ֆիլմ, որին հաջորդել է զրույց թանգարանի ստեղծման գաղափարի, ներկայացված ցուցանմուշների և հարուստ հավաքածուի ձևավորման շուրջ։ Խոսվել է նաև Կարեն Դեմիրճյանի կյանքի ուշագրավ և քիչ հայտնի դրվագների մասին։
Այցի ավարտին հյուրերը «Արմավիր» քրեակատարողական հիմնարկի գրադարանին նվիրել են Կարեն Դեմիրճյան անհատի և քաղաքական գործչի մասին պատմող գրքեր և մենագրություններ։
