Հայ Առաքելական եկեղեցու Վայոց Ձորի թեմի առաջնորդ տեր Աբրահամ արքեպիսկոպոս Մկրտչյանը եկեղեցում բաժանում չի տեսնում:
«Եթե դուք ցանկանում եք այդպիսի բաժանում տեսնել, ես այդպիսի բաժանում չեմ տեսնում»,- այսօր Մայր Աթոռում հրավիրված եպիսկոպոսաց ժողովից առաջ լրագրողներին ասաց Աբրահամ սրբազանը:
Նա ասաց, որ ժողովի օրակարգին ծանոթ չէ, այդ թվում՝ տեղեկություններ չունի՝ Արշակ սրբազանի ծառայության ժամանակավոր կասեցման հարցը կքննվի՞, թե՞ ոչ: Հարցին՝ ինքը ինչ դիրքորոշում ունի այդ հարցի վերաբերյալ, պատասխանեց՝ քննարկման արդյունքում կերեւա:
Հարցին՝ եթե իշխանությունները գան «վեհարանը վեհից» ազատելու, ինքը բարիկադի ո՞ր կողմում կլինի, Աբրահամ սրբազանը պատասխանեց՝ հստակ չի՝ կլինի՞, թե չի՞ լինի նման գործողություն. «Հուսամ՝ նման լարում ու ծայրահեղ վիճակ չի լինի ու դա կլինի լավագույնը: Ես չեմ կարող այս պահին ենթադրել ու պատասխանել, բոլորիս երազանքն է ունենալ խաղաղ ու ապահով երկիր»:
Նա ասաց՝ երկու կողմերի համար էլ կան ճանապարհներ եւ դրանք կարող են գտնվել:
Նա հստակ գնահատական չտվեց՝ կարգալույծ եղած քահանան եթե պատարագ է շարունակում մատուցել, պղծո՞ւմ է եկեղեցին: Ասաց՝ Մայր Աթոռը, եթե նման գնահատական ունի, ինքը դրան դեմ չի կարող լինել, բայց խուսափեց անձնական գնահատական տալ, օրինակ՝ Հովհաննավանքի կարգալույծ քահանայի դեպքով:
Արփինե ՍԻՄՈՆՅԱՆ
