Գերմանիայի հայոց թեմի առաջնորդ Գերաշնորհ Տ․ Սերովբե եպիսկոպոս Իսախանյանը 24news-ի եւ news.am-ի հետ զրույցում վստահեցնում է՝ չի տիրապետում իրավիճակին, չի կարող մեկնաբանել Արշակ սրբազանի ծառայությունը կասեցնելու եպիսկոպոսների հնարավոր պահանջը: Ասաց՝ ծանոթ չէ տեքստին:
Հիշեցնենք, որ եպիսկոպոսների հնարավոր պահանջագրում Սերովբե սրբազանի անունը կար, ստորագրությունը՝ ոչ: Այդ նույն պահանջագրում, ըստ հրապարակված գրության, եպիսկոպոսները պահանջում էին նաեւ Վեհափառ հայրապետի հրաժարականը:
Սերովբե սրբազանին հարց ուղղվեց՝ ինքը պահանջո՞ւմ է Վեհափառի հրաժարականը, ի պատասխան ասաց՝ ոչ:
Կարդացեք նաև
Հարցին՝ Հայ Առաքելական եկեղեցին պառակտվե՞լ է, պատասխանեց՝ հուսամ չէ:
Նրա խոսքով՝ ինքը եպիսկոպոսների ժողովին մասնակցել է , ժողովի ընթացքում չի քննարկվել Արշակ սրբազանի ծառայությունների սառեցման հարցը, իսկ Արշակ սրբազանին վերագրվող հայտնի տեսանյութի վերաբերյալ քննարկում է եղել Վեհափառ Հայրապետի ու հանձնախմբի անդամների միջեւ:
Անդրադառնալով Նիկոլ Փաշինյանի մասնակցությամբ կանոնական խախտումներով անցկացված վերջին պատարագներին, որոնց ժամանակ ամենայն հայոց կաթողիկոսի անունը չի տրվել՝ Սերովբե սրբազանն ասաց՝ ճիշտ ճանապարհ չի համարում դա. «Եկեղեցին այն տեղը չէ, որտեղ կարելի է այսպիսի հարցեր լուծել»:
Սերովբե սրբազանը հույս հայտնեց, որ հակաեկեղեցական արշավի շրջանակներում չեն գա Մայր Աթոռից վեհափառին հեռացնելու, ասաց՝ դա իրավական գործընթաց չէ. «Չեմ կարծում, որ դա իրավական է, ավելին ի՞նչ ասեմ»:
Անդրադառնալով կալանավորված սրբազաններին, Սերովբե սրբազանը կրկին հույս հայտնեց՝ արդարությունը կհաղթի, կպարզվի՝ կալանավորված հոգեւորականները հակաիրավական քայլ չեն արել ու ի վերջո կարդարացվեն:
Արփինե ՍԻՄՈՆՅԱՆ
