ԱԺ «Հայաստան» խմբակցության պատգամավոր Աննա Գրիգորյանն առաջարկում է պարտադիր ապահովագրական համակարգում՝ պետության կողմից հովանավորյալների կարգում ներառել ոչ թե 65+ տարիքի անձանց, ինչպես սահմանել է կառավարությունը, այլ՝ 63+ տարիքի անձանց։ Խոսքը, ընդհանուր առմամբ, 100 հազար մարդու է վերաբերվում։
Առողջապահության նախարար Անահիտ Ավանեսյանը պարզաբանեց՝ հաշվարկները կատարվել են ըստ պետության հնարավորությունների եւ 400 հազար քաղաքացիների համար պետությունը պարտավորություն է վերցրել իր վրա։ Այս պահին սա է հնարավորությունը։
Ընդդիմադիր պատգամավորը տարակուսեց․ «Չորս տարվա ընթացքում այնպես աշխատեիք, որ հնարավոր լիներ»։ Անահիտ Ավանեսյանը հակադարձեց՝ ընդդիմադիր պատգամավորին առաջարկելով պաթետիկ հարցերով չապակողմնորոշել քաղաքացիներին։
Հիշեցնենք, ԱԺ առողջապահության մշտական հանձնաժողովում քննարկվում է «Առողջության համընդհանուր ապահովագրության մասին» օրենքի նախագիծը։
Կարդացեք նաև
Մանրամասները՝ տեսանյութում
Ընդդիմադիր պատգամավորներին հետաքրքրում էր նաեւ առաջարկվող ծառայությունների ցանկը։ Անահիտ Ավանեսյանն ասաց՝ այն կհաստատվի եւ կհրապարակվի օրենքի գոյությունից հետո, բայց հուշեց՝ ընդդիմադիր պատգամավորները ունեին հնարավորություն նախագծի բոլոր փուլերում էլ դիմել եւ ծանոթանալ գործընթացին։ Նա հայտարարեց՝ փաթեթը գաղտնի չի պահվում, ինքն ամեն օր է խոսում այն մասին, թե ի՞նչ ծառայություններ են մտնում պարտադիր ապահովագրական համակարգի ցանկի մեջ, պարզապես այն դեռ նախագիծ է, հաստատված չէ, քննարկելի է եւ փոփոխման ենթակա։
Արմենուհի Կյուրեղյանը տարակուսեց․ «Եկել եք ԱԺ, պատգամավորներին առաջարկում եք մի բան՝ մոտավոր եւ ասում եք «կողմ» քվեարկեք, մեզ վստահեք, անենք»։ Ընդդիմադիրները առաջարկում են գոնե պատգամավորների համար ներկայացնել սահմանված գումարի շրջանակում առաջարկվող ծառայությունների ցանկը, որպեսզի հասկանալի լինի թե ինչի՞ն պետք է մարդիկ քվեարկեն։
Մանրամասները՝ տեսանյութում
Ամբողջական տեսանյութը՝ այստեղ
Նելլի ԳՐԻԳՈՐՅԱՆ
