ՀՀ ԱԺ եւ ՌԴ ԴԺ միջեւ համագործակցության միջխորհրդարանական հանձնաժողովի համանախագահների երրորդ աշխատանքային հանդիպման շրջանակում ՀՀ Ազգային ժողովի նախագահի տեղակալ Հակոբ Արշակյանի գլխավորած պատվիրակությունը մասնակցել է ծովակալ, Խորհրդային Միության հերոս Հովհաննես Իսակովի արձանի բացման հանդիսավոր արարողությանը:
Հակոբ Արշակյանը ողջույնի խոսքում ընդգծել է, որ հայ ժողովրդի զավակի՝ խորհրդային հայտնի ծովակալի հուշարձանի բացումը երկու երկրների եւ ժողովուրդների ընդհանուր պատմության, ինչպես նաեւ ազատությունն ու խաղաղությունը պաշտպանողների հիշատակի նկատմամբ խոր հարգանքի խորհրդանիշ է:
«Հովհաննես Ստեփանի Իսակովի անունը հավիտյան մտել է նավատորմի պատմության մեջ եւ դարձել համազգային հիշողության մի մասը որպես անսասանության խորհրդանիշ, որը սերունդների է ոգեշնչել եւ շարունակում է ոգեշնչել»,- ասել է Հակոբ Արշակյանը:
Նա ընդգծել է, որ Հովհաննես Իսակովը ոչ միայն տաղանդավոր զինվորական հրամանատար եւ գիտնական էր, այլեւ իսկական հայրենասիրության, քաջության եւ հավատարմության մարմնացում:
Կարդացեք նաև
«Նրա կյանքը խորհրդանշում է անձնազոհ ծառայությունը հայրենիքին եւ օրինակ է այն բանի, թե ինչպես պատիվը, պարտքը եւ գործին նվիրվածությունը կարող են դառնալ ուղեցույց սերունդների համար: Թող այս հուշարձանը լինի անսասան ոգու խորհրդանիշ, ինչպես նաեւ հիշեցում այն մասին, որ հայրենիքի համար կատարված սխրանքը ժամանակ չի ճանաչում»,- նշել է ԱԺ փոխնախագահը:
«Հայ ժողովրդի մեծ զավակ Իվան Ստեփանի Իսակովն իր ամբողջ կյանքի ընթացքում հայրենիքին իսկական ծառայության, զինվորական եւ սպայական պարտքի օրինակ է ծառայել: Կարծում եմ, որ Կրոնշտադտում կիսանդրու բացումը եւս մեկ ապացույց է Ռուսաստանի եւ Հայաստանի ժողովուրդների միջեւ պատմական կապերի ամրության եւ անխզելիության»,- ընդգծել Է իր ելույթում Ռուսաստանի Դաշնության Դաշնային ժողովի Դաշնության խորհրդի նախագահի տեղակալ Յուրի Վորոբյովը:
Հայրենական մեծ պատերազմի տարիներին Հովհաննես Իսակովը մասնակցել է Բալթյան երկրների, Լենինգրադի, Ղրիմի եւ Կովկասի պաշտպանության ռազմական գործողությունների պլանավորմանը? Արժանացել է Խորհրդային Միության հերոսի կոչման, պարգեւատրվել բազմաթիվ շքանշաններով:
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱԶԳԱՅԻՆ ԺՈՂՈՎԻ ՀԱՍԱՐԱԿԱՅՆՈՒԹՅԱՆ ՀԵՏ ԿԱՊԵՐԻ ԵՎ ՀԱՂՈՐԴԱԿՑՈՒԹՅԱՆ ՎԱՐՉՈՒԹՅՈՒՆ
