Այսօր մի խումբ արցախցիներ հավաքվել էին ՀԱԵ Արցախի թեմի առաջնորդարանի դիմաց՝ պահանջելով, որպեսզի Արցախի թեմի առաջնորդ Տեր Վրթանես եպիսկոպոս Աբրահամյանը հանդիպի իրենց եւ պարզաբանում տա, թե ինչո՞ւ էր հանդիպել Նիկոլ Փաշինյանի հետ։
Ավելի վաղ արցախցի փաստաբան Ռոման Երիցյանը կոչ էր արել արցախցիներին հավաքվել ՀԱԵ Արցախի թեմի առաջնորդարանի դիմաց եւ «Վրթանես Սրբազանից պահանջել հրապարակային ներողություն՝ Արցախը Ադրբեջանի կազմում ճանաչած իշխանությանը հարգանքի արժանացնելու, հայկական սրբությունները պղծության հանձնողին պատվելու եւ մեր ժողովրդի ցավը անտեսելու համար»։
«Հաշվի առնելով հանրային արձագանքը՝ պահանջելու ենք ոչ միայն ներողություն խնդրել, այլեւ գլխիկոր հրաժարվել Արցախի թեմի առաջնորդի պաշտոնից։ Նման արարքից հետո բարոյական իրավունք պարզապես չի մնացել առաջնորդելու մի ժողովրդի, որի ցավը նա անտեսեց իր այդ քայլով»,- սոցիալական ցանցում գրել էր Ռոման Երիցյանը։
Այսօրվա հավաքը, սակայն, սակավամարդ էր։ «Մենք այստեղ առանձնապես մարդկանց հավաքելու նպատակ չենք հետապնդել։ Բոլոր այն մարդիկ, ովքեր զայրույթով են արձագանքել տեղի ունեցածին, կարող են ներկայանալ այստեղ եւ իրենց խոսքը փոխանցել։ Այնուամենայնիվ նկատի ունենալով համացանցի գրառումները եւ կոնկրետ իմ հրապարակմանը ցուցաբերված արձագանքը՝ ես ավելի քան վստահ եմ, որ այն հարցերը, որոնք ինձ այս պահին հետաքրքրում են, հետաքրքրում են նաեւ բոլոր արցախցիներին։ Իմ գրառմանն արձագանքեցին նաեւ Արցախի նախկին պաշտոնյաները, այդ թվում՝ պատգամավորները, գրեթե բոլոր արցախցիները»,- այսօր լրագրողների հետ զրույցում ասաց Ռոման Երիցյանը։
Կարդացեք նաև
Նա նշեց, որ հայտնի է՝ այսօր ՀՀ իշխանություններն արշավ են սկսել Վեհափառի նկատմամբ՝ պայմանավորված նրանով, որ նա Շվեյցարիայում բարձրաձայնել էր արցախցիների վերադարձի եւ գերիների վերադարձի հարցերը։ «Թե ինչ վերաբերմունք է ցուցաբերում ՀՀ վարչապետը Արցախի եւ արցախցիների նկատմամբ, բոլորս գիտենք։ Եվ մեզ շատ հետաքրքիր է, թե ինչպե՞ս է Արցախի թեմի առաջնորդն իրեն իրավունք վերապահում նման հարգանքի տուրք մատուցել ՀՀ վարչապետին։ Սա բոլոր արցախցիների մոտ զայրույթ է առաջացնում։ Եվ դրանով պայմանավորված՝ կոնկրետ ես եկել եմ պարզաբանում պահանջելու»,- ասաց Երիցյանը։
Հարցին, թե Նիկոլ Փաշինյանը կարո՞ղ է ճնշումներ գործադրած լինել Վրթանես սրբազանի նկատմամբ, նա պատասխանեց․ «Հենց դա է պատճառ մեր կողմից այսօր այստեղ ներկայանալու, հնարավոր է այնպիսի պատճառներ կան, որոնց մասին մենք անգամ իրազեկված չենք։ Պետք է պարզել, միգուցե մարդն այնպիսի պարզաբանում է տալիս, որ, այո, իրոք ինձ շանտաժի են ենթարկել կամ նման այլ բան»։
Անդրադառնալով Վրթանես սրբազանի հայտարարությանը՝ Ռոման Երիցյանն ասաց․ «Նա նշում է՝ ես կիսում եմ արցախցիների գաղափարը։ Բայց արցախցիների գաղափարները, ես վստահեցնում եմ, չեն համընկնում այս պահի դրությամբ իր առաջ քաշած գաղափարներին։ Արցախցիների գաղափարների մեջ ներառված չեն Արցախի վերադարձի հարցը փակելը, Մինսկի խումբը լուծարելը, Արցախի էջը փակելը։ Եթե դու հանդիպում ու խոնարհվում ես մի մարդու առջեւ, ով այդ գաղափարներն ընդհանրապես առաջ չի քաշում, այդ նույն տրամաբանությամբ մարդը կարող է վաղը հանդիպել Իլհամ Ալիեւի կամ Ադրբեջանի հոգեւոր առաջնորդի հետ եւ ասել՝ ես շարունակում եմ կիսել արցախցիների գաղափարները եւ հավատարիմ եմ իմ հոտին։ Արցախցիները չեն կարող ունենալ այնպիսի հոգեւոր առաջնորդ, ով կիսում է Արցախը լուծարված լինելու վերաբերյալ գաղափարները»։
Ռոման Երիցյանը զանգահարեց Վրթանես սրբազանին, որպեսզի նա գար ու հանդիպեր այսօրվա ակցիայի մասնակիցների հետ։ Սակայն Վրթանես սրբազանը չպատասխանեց նրա զանգերին։ «Զանգին չպատասխանելը, առաջնորդարանում չգտնվելը վերաբերմունք է, որն անընդունելի է արցախցիների համար։ Սրա պատասխանը կլինի արդեն բոլոր արցախցիներին այստեղ հրավիրելը, եւ միգուցե արցախցիների քանակով պայմանավորված՝ վերջինս հարկ կհամարի հանդիպել մեզ հետ ու բացատրություն տալ իր կատարած քայլերի համար»,- նշեց փաստաբանը։
Իրավապաշտպան Ռուբեն Մելիքյանն էլ լրագրողներին ասաց․ «Տասնյակից ավելի արցախցիներ են այստեղ, որոնք պահանջում են հանդիպում Վրթանես սրբազանի հետ։ Չգիտենք՝ գուցե Վրթանես սրբազանն ինչ-որ բան գիտի, որը մենք չգիտենք։ Գուցե մեզ համոզում է, ասում է՝ պետք է իսլամ ընդունենք, ի՞նչ իմանանք, գուցե Փաշազադեի խոսքերն իր համար համոզի՞չ են, որ ինքը խոնարհվում է Նիկոլ Փաշինյանի առջեւ։ Մյուս տարբերակն այն է, որ Վրթանես սրբազանը գերու կարգավիճակում է գտնվում։ Դե թող գա ասի՝ ժողովուրդ ջան, գերու կարգավիճակում եմ, կներեք, բայց պետք է մարդկանց հետ հանդիպի։ Ինձ համար անհասկանալի է, թե ինչո՞ւ նա հարկ չի համարել մարդկանց հետ հանդիպել։ Երբ հոտը հովիվի կարիք ունի, հովիվը գայլերի հետ գտնվում է կերուխումի մեջ, ինձ համար անհասկանալի իրավիճակ է»։
Ռոզա ՀՈՎՀԱՆՆԻՍՅԱՆ
