«Խաղաղության կամուրջ» նախաձեռնության անդամների նոյեմբերի 21-22-ին Ադրբեջան այցի շրջանակում տեղի է ունեցել հանդիպում Ադրբեջանի նախագահի օգնական, նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևի հետ։ Եվ «Անվտանգային քաղաքականության հետազոտական կենտրոն» ՀԿ նախագահ Արեգ Քոչինյանը Իլհամ Ալիևի օգնականի փոխանցած ուղերձների մասին ասուլիսում մանրամասնել էր․ «Առաջին ուղերձն այն է, որ պատերազմն ավարտվել է Ադրբեջանի համար․ այլևս պատերազմ չկա, որ հայ ադրբեջանական կոնֆլիկտն իրենց համար ավարտված է, որ ուզում են այս չպատերազմ վիճակից կառուցեն խաղաղություն և գնան դեպի խաղաղության ու իրենց համար կարևոր է այս ուղերձը մեր միջոցով փոխանցել ՀՀ հանրությանը, որ իրենք ցանկանում են ՀՀ-ի հետ համապարփակ և երկարաժամկետ խաղաղություն կառուցել և պատրաստ են այդ ճանապարհով գնալ առաջ, և որ Ադրբեջանը ՀՀ-ի նկատմամբ որևէ տարածքային պահանջ չունի»։
«Առավոտի» «Առերեսում» հաղորդաշարի ընթացքում «Հենակետ» վերլուծական կենտրոնի նախագահ Վիտալի Մանգասարյանն այս առնչությամբ ասաց. «Ուղղակի ուզում եմ ներկայացնեմ, թե ո՞վ է Հիքմեթ Հաջիևը և ի՞նչ գործառույթ ունի նա Ադրբեջանում։ Հիքմեթ Հաջիեւն այն անձնավորությունն է, որն, ընդհանուր առմամբ ղեկավարում է Ադրբեջանի հակահայկական քարոզչությունը, արդարացնում մարդասպաններին՝ մարդկանց գլուխը կտրողներին, քնած տեղը կացնով հարվածողներին… 44-օրյա պատերազմի ժամանակ Հաջիեւը հենց այդ քարոզչական ճակատի ղեկավարն էր։ Այսինքն՝ ինքն այդ հակահայկական ամբողջ ատելության այսպես ասած «քավորն» էր Ադրբեջանում, և Ալիևի ամենամտերիմ շրջապատի մարդկանցից մեկն է, և նա այսպես ասած՝ հասարակ օգնականներից չէ։
Եվ այդ մարդը հիմա փորձում է մեզ համոզել, որ գիտեք ինչ կա՝ ընդունեք, որ այս տարիների ընթացքում եղել եք օկուպանտ, եղել եք մեր տարածքները ապօրինի բռնազավթած մարդիկ, մենք ձեզ չենք ստիպել, որ դուք լքեք ձեր տները: Եվ ընդհանուր առմամբ՝ 2023 թվականից հետո ինչ տեղի է ունեցել Արցախի հետ, ինչ տեղի է ունեցել հայ ժողովրդի հետ, բերեք մոռանանք և փորձենք այս պահից սկսած բարեկամական հարաբերություններ կառուցենք։
Բայց այստեղ խնդիրը ո՞րն է՝ արդյոք նրանց կատարած քայլե՞րը… Խոսքը չէ՝ նորմալ է. Ալիևն էլ է միշտ խաղաղությունից խոսում, պատերազմից ոչ մեկը չի խոսում։ Այսինքն՝ ընդունել հալած յուղի տեղ, որ Ալիևի օգնականն ասել է՝ մենք խաղաղություն ենք ուզում… Բա ի՞նչ պիտի ասեր Ալիևի օգնականը, պետք է ելներ՝ հայտարարեր, որ մենք պատերա՞զմ ենք ուզում Հայաստանի հետ։ Այսինքն՝ կառուցողական դիրքորոշում են փորձում որդեգրել և, ընդհանուր առմամբ, ցույց տալ, որ մենք ձեր հետ հարց չունենք, բայց դուք պետք է ընդունեք այս, այս պայմանները։
Կարդացեք նաև
Իսկ որո՞նք են այդ պայմանները, ինչպես նշեցի, առաջինը՝ մենք եղել ենք օկուպանտ, և մեր ամբողջ իշխանության այս քարոզչությունը հենց դրա վրա են փորձում կառուցել, ինչը երկարաժամկետ և միջնաժամկետ կտրվածքով մեր համար լուրջ պրոբլեմներ են լինելու։ Մենք չենք կարողանալու միջազգային հանրությանը համոզել, որ գիտե՞ք ինչ կա, որ մենք օկուպանտ լինեինք՝ մեզ հանդեպ որոշակի սանկցիաներ կկիրառվեին, որոշակի գործողություններ կանեին։ Բա Մինսկի խումբը, միջուկային գերտերությունների ղեկավարներով հանդերձ, որ զբաղվել է այս կոնֆլիկտով, մենք հիմա ո՞նց ենք գնում այդ ճանապարհով»:
Քիչ անց հավելեց. «Եթե ուզում են գնան երկարաժամկետ խաղաղության, բա հարց է, չէ՞, առաջանում՝ բա ի՞նչ գործ ունեն այնտեղ մեր գերիները։ Բա հարց է առաջանում, չէ, բա այդ դեպքում ինչի դուրս չեն գալիս Սեւ լճի մեր ինքնիշխան տարածքից, կամ զորավարժության սցենարով, որ իրենք մոդելավորում են արդեն քաղաքային մարտեր, եւ պարզ է, չէ՞, ում նկատի ունեն եւ ինչ սցենարներ են նրանք փորձում «մոդելավորել»: Այսինքն՝ գործողությունները ու քայլերը ոչ մի կերպ իրար չեն բռնում»:
Զրույցն ամբողջությամբ՝ այսօր 22.00-ին
Աննա ԻՍՐԱՅԵԼՅԱՆ
