«Անվտանգային քաղաքականության հետազոտական կենտրոն» ՀԿ նախագահ Արեգ Քոչինյանը, որը մաս է կազմում «Խաղաղության կամուրջ» նախաձեռնությանը, ասուլիսում ասել էր. «Այն բարկացվածությունը, նեղսրտվածությունը, անվստահությունը, ինչ-որ չափով վախը, քաղաքական դաշտում տարբեր գործիչներ փորձում են ամեն կերպ կապիտալիզացնել, ամեն կերպ օգտագործել իրենց քաղաքական նպատակների իրականացման գործում, ինչը իմ կարծիքով բավականին զազրելի երևույթ է։ Իմ կարծիքով, Հայաստանի քաղաքական դաշտում այս պահի դրությամբ, ով որ դեմ է խոսում հայ-ադրբեջանական կարգավորմանը և հայ-թուրքական կարգավորմանը, կամ ուղղակի օտարերկրյա գործակալ է, սրիկա է, կամ ուրեմն ապաքաղաքական ապուշ է, որը որ չի հասկանում, թե ինքը ինչ է խոսում»։
«Առավոտի» «Առերեսում» հաղորդաշարի ընթացքում մեջբերելով այս հայտարարությունը՝ նախապես խնդրել էինք, որ պատասխան վիրավորանքներ չհնչեն, քանի որ մյուս կողմը ներկա չէ տաղավարում: Եվ «Քաղաքական հայ» ակումբի համահիմնադիր Կարեն Վրթանեսյանն ուղղակի ասաց. «Չկա որևէ կարգավորում այս պահի դրությամբ։ Ես ասում եմ որպես մարդ, որը հասկանում է՝ ռազմական գործընթացները ոնց են արվում։ Այս պահին ամեն կերպ Հայաստանին հետ են պահում իր պաշտպանունակությունը վերականգնելուց, ամեն կերպ հետ է գցվում, ամեն կերպ թուլացվում են Հայաստանի պաշտպանական բոլոր մեխանիզմները՝ թե ռազմի դաշտում, թե գետնի վրա, թե միջազգային քաղաքականության ասպարեզում, թե տեղեկատվական ասպարեզում և այլն, և այլն: Ամեն կերպ թուլացվում է Հայաստանի պաշտպանունակությունը։ Իսկ Ադրբեջանը այդ ընթացքով օրեցօր ավելի է մեծացնում իր ռազմական և քաղաքական հնարավորությունները։ Հիմա այս իրավիճակում ի՞նչ կարգավորման մասին կարող է խոսք գնալ։
Մեզ ամեն օր զանազան Արեգ Քոչինյաններ, Բորիս Նավասարդյաններ, ինչպես նաև Նիկոլ Փաշինյաններ, Արարատ Միրզոյաններ, Ռուբեն Ռուբինյաններ և այլն՝ այդպիսի կերպարները ամեն օր մի կողմից փափուկ բարձ են դնում հայերիս գլխի տակ, մյուս կողմից իրականում անընդհատ շանտաժ են անում պատերազմով։ Մեզ չընտրեք՝ պատերազմ կլինի, այսինչ բանը չհանձնենք՝ պատերազմ կլինի, Մասիս սարի վրա չնայեք՝ պատերազմ կլինի։ Այդ ի՞նչ է, եթե ոչ շանտաժ։ Եկեղեցու վրա հարձակումները էլի էդ պատերազմով շանտաժի մի մասն են:
Եկեղեցին այսօր խոսում է հայերի, հայ ազգի դիրքերից, ազգապահպան դիրքերից, այդ թվում՝ գերիների մասին է խոսում, բարձրաձայնում է բոլոր միջազգային հարթակներում, բոլոր հանդիպումների ժամանակ։ Եկեղեցու դեմ այսօրվա հարձակման շահառուներն են Թուրքիան, Ադրբեջանը և Նիկոլ Փաշինյանի խմբակը։ Այսինքն՝ այն, ինչում մեղադրում են մեզ, ովքեր լրիվ հիմնավոր կասկածի տակ ենք դնում, որ դա իրականում խաղաղություն չի, դա կարգավորում չի, դա սահմանազատում չի։ Հիմա մեզ վիրավորում են: Եթե վիրավորում են՝ նշանակում է ուրիշ փաստարկ չունեն»:
Կարդացեք նաև
Հաղորդման մյուս հյուրը՝ «Հենակետ» վերլուծական կենտրոնի նախագահ Վիտալի Մանգասարյանն էլ հավելեց. «Ես չգիտեմ նորմալ բանական, մտածող մարդ, քաղաքական գործիչ, որը կարող է դեմ լինի հայ-ադրբեջանական խաղաղությանը, որը կարող է դեմ լինի հայ-թուրքական հարաբերությունների վերականգնմանը։ Վերջին 30 տարիների մեր պատմությունը ցույց է տալիս, որ մեր բոլոր ղեկավարներն էլ այդ ուղղությամբ քայլեր արել են։ Այլ հարց է, թե դրա գինը ի՞նչ պետք է մենք վճարենք… Բայց նորից եմ կրկնում՝ մենք չենք ունեցել այնպիսի երկրի ղեկավարներ, ովքեր դեմ լինեն թե հայ-ադրբեջանական խաղաղությանը, թե հայ-թուրքական խաղաղությանը»:
Հաղորդումն ամբողջությամբ՝ 22.00-ին
Աննա ԻՍՐԱՅԵԼՅԱՆ
