Սույնով ներկայացնում եմ հերթական և խիստ մտահոգիչ միջադեպը, որը վկայում է, որ ՀՀ իշխանությունների կողմից իմ նկատմամբ իրականացվող հետապնդման, ահաբեկման և մասնագիտական գործունեությանը խոչընդոտելու համընդհանուր և համակարգված բնույթը շարունակվում է։ Այս վարքագծի նախաձեռնողն է ՀՀ արդարադատության նախարար Սրբուհի Գալյանը, իսկ իրականացնողները՝ նրա անմիջական վերահսկողության ներքո գործող Քրեակատարողական ծառայության ղեկավարը՝ տիկին Ծովինար Թադևոսյանը, ինչը պայմանավորված է այն հանգամանքով, որ ես ներկայացնում եմ քաղաքական և կալանքի պայմաններին առնչվող մի շարք գործեր։
Ինչպես արդեն նշված էր իմ երեկ ներկայացրած պաշտոնական բողոքում, Հայաստանի իշխանությունները հետևողականորեն իրականացնում են մասնագիտական գործունեության իմ պարտականություններին ուղղված կանխամտածված և ապօրինի խոչընդոտումներ։ Այսօրվա միջադեպը այդ վարքագծի ևս մեկ դրսևորումն է։
Այսօր մուտք գործելով Արմավիրի քրեակատարողական հիմնարկ, հիմնարկի աշխատակիցները ցինիկ ձևով վերցրել են իմ հեռախոսը, այն դեպքում, երբ հեռախոսը վերցվել է մուտքի վերահսկողության ընթացքում, ոչ թե դրա ժամանակ։ Ես որևէ արգելված իր իմ հետ չեմ մտցրել քրեակատարողական հիմնարկ, ոչ էլ որևէ փորձ է կատարվել:
Մուտք գործելիս Աշխատակազմի ներկայացուցիչները ինձ ստուգելու ընթացքում խլեցին հեռախոսը՝ մանիպուլացնելով և հայտարարելով, թե իբր արգելված իր եմ տանում: Այսպիսով, նրանք ապօրինի առգրավեցին հեռախոսս և այն պահում են իրանց մոտ՝ առանց ներկայացնելու իրավական հիմք։ Միակ «բացատրությունն» այն էր, որ իբր ես «պրովոկացիա» եմ իրականացնում, մինչդեռ ակնհայտ է, որ պրովոկացիան և ապօրինի վարքագիծը բխում են հենց իրենց գործողություններից։ Իմ հեռախոսը այս պահին առգրաված է:
Կարդացեք նաև
Տվյալ միջադեպի հանգամանքներից ելնելով՝ ունեմ հիմնավոր կասկած, որ իմ հեռախոսը վերցնելու նպատակը եղել է մասնագիտական գաղտնի տեղեկատվությանը հասանելիություն ստանալը։ Այս կասկածը առավել ամրապնդվում է հետևյալով: «Արմավիր» ՔԿՀ-ում փաստաբանների իրերը չեն պահվում փակվող կամ անվտանգ վայրերում, ինչը հնարավորություն է տալիս աշխատակազմին անխոչընդոտ ծանոթանալ փաստաբանի փաստաթղթերին կամ հեռախոսներին և այսօր կատարվածն ամբողջությամբ տեղավորվում է այդ գործելաոճի մեջ։ Բացի այս, հեռախոսս առգրավելիս, այն չի փաթեթավորվել, ինչպես պահանջում է օրենքը: Չնայած իմ բազմակի պահանջներին՝ աշխատակիցները հրաժարվել են ներկայացնել որևէ իրավական հիմք և վերադարձնել իմ հեռախոսը։
Այս հայտարարության պատրաստման պահին իմ հեռախոսը դեռ պահվում է նրանց մոտ՝ ապօրինի ձևով։
Վերոգրյալի հիման վրա պահանջում եմ․
ՀՀ արդարադատության նախարարից․
- անհապաղ դադարեցնել քրեակատարողական հիմնարկի աշխատակիցների ապօրինի գործողությունները,
- ապահովել իմ հեռախոսի վերադարձը,
- երաշխավորել իմ մասնագիտական անկախությունն ու փաստաբանական գաղտնիության պաշտպանությունը։
ՀՀ Գլխավոր դատախազից․
- սույն հայտարարությունը ընդունել որպես հանցագործության մասին հաղորդում,
- նախաձեռնել քրեական գործ՝ պաշտոնեական լիազորությունների չարաշահման, մասնագիտական գործունեությանը խոչընդոտման և փաստաբանի գաղտնիության խախտման վերաբերյալ։
ՀՀ Փաստաբանների պալատից․
- գործարկել փաստաբանի պաշտպանության բոլոր մեխանիզմները,
- իրականացնել անկախ գնահատում այս շարունակական հետապնդումների վերաբերյալ։
ՀՀ Մարդու իրավունքների պաշտպանից․
- սկսել անկախ, բազմակողմանի քննություն,
- այցելել Արմավիրի ՔԿՀ,
- ուսումնասիրել փաստաբանների նյութերի պահման և հասանելիության կարգը,
- հրապարակել հայտնաբերված համակարգային խախտումների վերաբերյալ եզրակացություն։
Այսօրվա դեպքը հանդիսանում է ինստիտուցիոնալ հետապնդման հերթական և վտանգավոր դրսևորում։ Այս քայլերը միտված են՝ լռեցնելու ինձ, խոչընդոտելու իմ պաշտպանական գործունեությունը, վախի մթնոլորտ ստեղծելու բոլոր փաստաբանների համար, ովքեր ներկայացնում են քաղաքական գործեր և ներկայացնում են կալանքի պայմանները։
Պահանջում եմ նշված բոլոր մարմինների անհապաղ միջամտությունը։
Զարուհի ՓՈՍՏԱՆՋՅԱՆ
30 նոյեմբերի, 2025թ.
