Ս․թ․-ի նոյեմբերի 24-ին և 25–ին «Հայաստան» համահայակական հիմնադրամը կազմակերպել է հաշվետու հանդիպում–քննարկում բանկային համակարգի և ՀՀ խոշոր ձեռնարկատիրությունների ներկայացուցիչների հետ: Հանդիպմանը մասնակցել է Հանրապետության նախագահ, «Հայաստան» համահայկական հիմնադրամի հոգաբարձուների խորհրդի նախագահ Վահագն Խաչատուրյանը:
Հանդիպման նպատակն էր, նախևառաջ, շնորհակալություն հայտնել հրավիրված նվիրատուներին նախորդ տարիների նվիրատվությունների համար և ներկայացնել, թե ինչ ծրագրերի են դրանք ուղղվել:
Քննարկման առանցքում էր նաև «Հայաստան» համահայկական հիմնադրամի ամենամյա հեռուստամարաթոնը, որն այս տարի ներկայանում է «Հայրենիք հավերժություն» խորագիրը կրող դրամահավաք–արշավի նոր ձևաչափով: Արշավի շրջանակում հավաքագրված դրամական միջոցները կուղղվեն Սյունիքի մարզի Սպանդարյանի ջրանցքի վերակառուցմանը: Ներկայումս Սպանդարյանի ջրանցքը վթարային է` մինչև 70% ջրային կորուստով, ինչի արդյունքում Սառնակունք, Իշխանասար, Ծղուկ, Սպանդարյան, Անգեղակոթ և Շաքի բնակավայրերը զրկված են ոռոգման ջրի հնարավորությունից։ Ջրանցքի վերակառուցումից հետո կապահովվի 2800 հա հողատարածքի արդյունավետ ոռոգում և 730 ընտանիք (4320 բնակիչ) կդառնա անմիջական շահառու:
Հանրապետության նախագահը կարևորեց նման ձևաչափով հանդիպումը և Հիմնադրամի որդեգրած թափանցիկ և հաշվետվողական մոտեցումը՝ ընդգծելով, որ Հիմնադրամը պետք է ոչ թե փոխարինի կառավարությանը, այլ ձգտի օգնել կառավարությանը՝ ռազմավարական առանջնահերթություն ունեցող խնդիրների լուծումներում:
Կարդացեք նաև
Ողջույնի խոսքից հետո Սպանդարյանի ջրանցքի վերակառուցման ծրագրի կարևորությանն անդրադարձան ՀՀ կենտրոնական բանկի նախագահ Մարտին Գալստյանը, Հայաստանի բանկերի միության նախագահ Դանիել Ազատյանը, Հայաստանի արդյունաբերողների և գործարարների միության նախագահ Արսեն Ղազարյանը և այլ ներկաներ։
«Հայաստան» համահայկական հիմնադրամի ժ.պ. Զարուհի Ազնաուրյանը հակիրճ ներկայացրեց Հիմնադրամի կողմից վերջին տարիներին իրականացրած առանցքային ծրագրերը, ոլորտային ուղղություններն ու արդյունքները, որին հաջորդեց Հիմնադրամի գործունեության վերաբերյալ քննարկում՝ հարցուպատասխանի ձևաչափով:
«Հայաստան» համահայկական հիմնադրամ. Անկախ Հայաստանի առաջին համահայկական հիմնադրամը, որը միավորում է հայրենիքն ու սփյուռքը:
«Հայաստան» համահայկական հիմնադրամ
