«1979 թ. մարդահամարի տվյալներով Հայաստանում եղել է 165 հազար ադրբեջանցի, Ադրբեջանում՝ 560 հազար հայ, իսկ 1989 թ. մարդահամարով, երբ լարված էին երկու ժողովուրդների միջեւ հարաբերությունները, Հայաստանում մնացել էր 85 հազար ադրբեջանցի, իսկ Ադրբեջանում դեռեւս կար 400 հազար հայ՝ ներառյալ Լեռնային Ղարաբաղի Հանրապետությունը»,-«Հայելի» ակումբում նշեց Հայաստանի նախկին վարչապետ Հրանտ Բագրատյանը՝ հերքելով Ալիեւի շրջանառած 300 հազար ադրբեջանցիների մասին թեզը: Նա նշեց, որ Ադրբեջանում ապրող 560 հազար հայերի անձնագրում ազգությունը գրված է եղել հայ:
«Ո՞ւր են 560 հազար հայերը, որ ապրել են Ադրբեջանում, ի դեպ, Բաքվի կենտրոնական թաղամասը կոչվում էր Արմենիքենդ, այնտեղ էր գտնվում բոլոր ժամանակների շքեղագույն եկեղեցիներից մեկը»,-ասաց Բագրատյանը՝ դիմելով այս փաստերի մասին լռող ՀՀ իշխանություններին:
Ինչ վերաբերվում է ՔՊ-ական պաշտոնյաների՝ այդ թեմայով տարբեր հայտարարություններին, ՀՀ նախկին վարչապետը նշեց. «Ալենի հիմքը Նիկոլի, Սուրեն Պապիկյանի եւ մյուս դավաճանների ասածն է: Գոյություն ունի 1988թ. հունվարի 12-ի պրոտոկոլ. Հայաստանի Հանրապետություն, տարածքը՝ 30 157 քառ. կմ: Ադրբեջանը ոչ մի էքսկլավ կամ Հայաստանի տարածքում՝ անկլավ, չունի… Դրա փոխարեն գոյություն ունի Արծվաշեն, որն, ի դեպ, այլեւս անկլավ չպետք է լինի եւ շրջակա հողերով պետք է անցնի Հայաստանի Հանրապետությանը:
Սահմանազատված եւ սահմանագծված է Հայաստանի Հանրապետության եւ Ադրբեջանի միջեւ 975 կմ սահմանից 969-ը եւ միայն 6 կմ-ն սահմանագծված չի եղել, չեն համաձայնվել, աշխատանքները պետք է շարունակվեին, հետո սկսվեցին այս իրադարձությունները: Էդ որտեղի՞ց գիտի Ալեն Սիմոնյանը, որ Քյարքին պիտի տա: Թուղթ ունե՞ս… Կլինի՞ մի հատ թուղթ ցույց տաս… Քարտեզն այն փաստաթուղթն է, որտեղ կա ե՛ւ Հայաստանի ե՛ւ Ադրբեջանի ստորագրությունը: Ամեն կողմ կարող է հազար տեսակի միակողմանի քարտեզ ցույց տալ, բայց դրանք որեւէ ուժ չունեն»:
Կարդացեք նաև
Հրանտ Բագրատյանն ընդգծում է. «Սա գալիս է նրանից, որ ՀՀ ղեկավարության մեջ դավաճանական գործելակերպին բնորոշ մարդիկ կան: Նույն Մհեր Գրիգորյանը: Այ ընկեր, ի՞նչ ես քննարկում Շահին Մուստաֆաեւի հետ: Ասում է՝ Ադրբեջանը չի համաձայնվում այդ քարտեզին… Տղա ջան, իրենք ստորագրել են, եթե չի համաձայնվում, ինչո՞ւ ես քննության հիմք վերցնում Ադրբեջանի ներկայացրած 1975, 76, 78 թվերի քարտեզները: Դա իր քարտեզն է, ինչ ուզել, գծել է»:
Գոհար ՀԱԿՈԲՅԱՆ
