«ԵՄ-Հայաստան համագործակցությունը գնալով լավանում է։ Այսօր նոր ռազմավարական օրակարգ ենք ընդունել ԵՄ-ՀՀ գործընկերության համար։ Սա ընդհանուր հավակնություն է բազմաթիվ այլ որլորտներում աշխատելու համար, աջակցելու ձեր բարեփոխումները, որոնք ուղղված են նաև ՀՀ տնտեսության դիվերսիֆիկացիայի, վիզաների ազատականացման և անվտանգության ոլորտներում»,- Բրյուսելում՝ Եվրոպական խորհրդի գլխադասային գրասենյակում կայացած ՀՀ-ԵՄ գործընկերության խորհրդի 6-րդ նիստի շրջանակներում ՀՀ-ԵՄ գործընկերության ռազմավարական օրակարգի փաստաթղթի ստորագրումից հետո հրավիրված մամուլի ասուլիսի ժամանակ ասաց ԵՄ ԱԳԱՔ բարձր ներկայացուցիչ Կայա Կալասը։
Ինչպես արդեն տեղեկացրել ենք՝ Բրյուսելում ՀՀ ԱԳ նախարար Արարատ Միրզոյանն ու Եվրամիության արտաքին գործերի և անվտանգության հարցերով բարձր ներկայացուցիչ Կայա Կալասը ստորագրեցին ՀՀ-ԵՄ գործընկերության ռազմավարական օրակարգի փաստաթուղթ: Լրագրողների հետ զրույցում ԵՄ ընդլայնման հարցերով հանձնակատար Մարթա Կոսը հայտնել էր, որ կունենանք ավելի ուժեղ անվտանգային և պաշտպանական համագործակցություն, ու աջակցությունը ՀՀ-ին կլինի ոչ միայն տնտեսապես, այլև առաջխաղացման առումով։
Նոր ռազմավարական օրակարգում երեք ամենակարևոր հենասյուներ կան։ Առաջինը ամրապնդված անվտանգային և պաշտպանական համագործակցությունն է, ոլորտային համագործակցությունը և վիզաների ազատականացումը։ Նաև նախատեսվում է աջակցություն ՀՀ-ին խորհրդարանական ընտրություններին նախապատրաստվելուն՝ ապատեղեկատվությանը հակազդելու կամ կիբերանվտանգության հարցում օգնելու առումով։
Կայա Կալասը ասուլիսի ժամանակ կարևորեց նաև ՀՀ-ի և Ադրբեջանի միջև խաղաղության գործընթացը և վստահեցրեց՝ այդ հարցում ունեք ԵՄ աջակցությունը։ Նա նաև հայտարարեց․ «Այսօր ես հայտարարում եմ 15 միլիոն եվրոյի մասին, որն ուղղվելու է դեպի խաղաղությանը և ավելի դիմակայուն ՀՀ-ն»։ Նաև մանրամասնեց՝ տրամադրվելու են ականարզերծման գծով սարքավորումներ, իրականացվելու են վերապատրաստումներ։
Կարդացեք նաև
Արարատ Միրզոյանը նշեց․ «Մեր քաղաքացիների համար կոնկրետ արդյունքներ ստեղծելու համար սկսել ենք վիզաների ազատականացման գործընթացը։ Դրա առաջընթացը տեսնում ենք գործողությունների ծրագրի տեսքով։ Դրա իրականացման արդյունքում կունենանք ավելի մեծ շարժունակություն և ի վերջո կհասնենք առանց վիզա ճամփորդելու հնարավորության։ Մյուսը անվտանգության և պաշտպանական ոլորտում ընդլայնման համագործակցությունն է։ Առաջին մասը ՀՀ-ն ստացավ խաղաղության գործիքի շրջանակներում․ դա նոր հորիզոններ է բացում համագործակցության համար։ Տնտեսությունը և բարեփոխումները, դիմակայության և աճի ծրագիրը չափազանց կարևոր է համագործակցության համար և ռազմավարական ոլորտում ներդրումներն ավելացնելու համար։ Վստահ ենք, որ մեր համագործակցությունն է՛լ ավելի կամրապնդի ՀՀ-ի դիմակայունությունը։ Չորրորդ բաղադրիչը կապակցվածությունն է։ Քննարկել ենք նաև ակտիվ աշխատանը TRIPP ծրագրի իրականացման ուղղությամբ։ Լրացուցիչ պոտենցիալ քայլերը՝ այդ թվում ՀՀ- Թուրքիա սահմանի բացումը և ենթակառուցվածքների մեխանիզմի ծրագրի իրականացումը կարող են փոխել տնտեսական ու քաղաքական ճարտարապետությունը ամբողջ տարածաշրջանում։ Քիչ առաջ ստորագրվեց ԵՄ-ՀՀ համագործակցության նոր ռազմավարությունը, և մեր համագործակցությունը բարձրացրինք ռազմավարական մակարդակի»։
Տաթև ՀԱՐՈՒԹՅՈՒՆՅԱՆ
Բրյուսել
