Ըստ հայցի գլխավոր դատախազության ընդդեմ Դավիթ Հարությունյանի եւ նրա հետ փոխկապակցված անձանց՝ ապօրինի ծագում ունեցող գույքի բռնագանձման պահանջի մասին հակակոռուպցիոն դատարանում Ռուդոլֆ Ավագյանի նախագահությամբ նախորդ դատական նիստում պատասխանող Դավիթ Հարությունյանը հարցեր էր բարձրացրել, որոնց պատասխանելու անհրաժեշտությամբ պայմանավորված դատախազությունը ժամանակ էր խնդրել։
Այսօրվա նիստում էլ արդարադատության նախկին նախարարի բարձրացված հարցերին մեծամասամբ հստակ պատասխաններ չհնչեցին։
Ռուդոլֆ Ավագյան
Նիստի ավարտից հետո Դավիթ Հարությունյանի շահերի ներկայացուցիչ Հարություն Հարությունյանը Aravot.am-ին ասաց. «Այսօրվա դատական նիստում հասցրեցինք ընդամենը անպատասխան մնացած նախորդ հարցերից երկուսին անդրադառնալ, որոնցում շատ մեծ խնդիրներ, շատ հակասական, պարոն Հարությունյանի բառերով ասած՝ թվաբանական աշխարհում գոյություն չունեցող իրավիճակ է առաջացել։ Պարզ օրինակ։ Մարդը որոշակի արտարժույթով ստանում է գումարի եկամուտ, հետո եկամուտը հանում է հաշվից։ Այնուհետեւ, այդ նույն գումարի մուտքը իրենք դիտարկում են ապօրինի մուտք՝ չունենալով որեւէ տվյալ, որ խոսքը վերաբերում է հենց նույն գումարին։
Եվ շատ կարեւոր մեկ խնդիր էլ արձանագրվեց, որ գումարն արտարժույթով ստանալիս եւ կանխիկացնելիս հաշվարկում են այդ օրվա կանխիկացման արժեքը, այլ ոչ թե սպառման դեպքում սպառման դրությամբ օրվա մեկ դրամի փոխարժեքի հարաբերակցությունը։ Երկու հստակ օրինակ բերելու դեպքում պարզ դարձավ, որ նույն գումարը ստանալիս եւ նույնը ծախսելիս՝ 200 հազար դրամի բացասական տարբերություն է թողնում եւ դա գնահատվում է որպես ապօրինի եկամուտ։ Այսինքն, $ 2500-ը իքս ժամանակահատվածում, երբ դոլարի փոխարժեքը պայմանական ասենք՝ 300 դրամ էր, երբ հետագայում այդ նույն $ 2500 գումարը ծախսում է, դոլարի փոխարժեքը 400 դրամ է, արդեն իսկ 200 հազար դրամի բացասական տարբերություն է տալիս։ Ու բոլոր գործերով անխտիր նույն տրամաբանությունն է դրված, ինչն ակնհայտ սխալ է»։
Կարդացեք նաև
Աշոտ ՀԱԿՈԲՅԱՆ
