Թալինի կարգալույծ հռչակված հոգեւոր հովիվ՝ Տեր Թադե քահանա Թախմազյանը՝ Արամայիս Թախմազյանը, դեռ չի որոշել՝ կարգալուծությունից հետո կշարունակի՞ ինքնակոչ ծառայությունը, ինչպես Հովհաննավանքի կարգալույծ քահանան՝ Ստեփան Ասատրյանը:
«Սպասելի էր այս որոշումը: Կմտածեմ, դեռ ժամանակ ունեմ մտածելու, իմ ընթացքով կգնամ հավանաբար: Մայր Աթոռը ինձ կարգալույծ չի արել, որոշ հոգեւորականներ են: Մայր Աթոռը շատ ավելի մեծ ու գեղեցիկ կառույց է: Որոշ հոգեւորականների կամ չհոգեւորականների որոշումն է սա»,- Aravot.am-ին ասաց Արամայիս Թախմազյանը:
Նրանից հետաքրքրվեցինք՝ Մայր Աթոռի կարգապահական հանձնախմբին ինչպես էր բացատրել Նիկոլ Փաշինյանի մասնակցությամբ պատարագին կաթողիկոսի անունը չտալը, Արցախը չհիշատակելը. «Բոլոր փաստերն իրենց ասել եմ, հավանաբար մի օր կհրապարակեմ»:
Նա վստահեցրեց, որ իրեն չեն հարկադրել կաթողիկոսի անունը չտալ պատարագին, իսկ անունը չտալն էլ, վստահեցրեց՝ կանոնական խախտում չէր. «Չէ, ի՞նչ ճնշման մասին է խոսքը, ոչ մի ճնշում: Դա կանոնական խախտում չէր»:
Կարդացեք նաև
Մեր հարցին՝ մշտապես այդպե՞ս եք պատարագներն անցկացրել՝ կաթողիկոսի անունը զեղչելով, պատասխանեց՝ այսքանով սահմանափակվենք: Մեր հաջորդ հարցին՝ այսինքն կամավո՞ր եք հրաժարվել կաթողիկոսի անունը տալուց՝ այդ կերպ փորձելով հաճոյանա՞լ իշխանություններին: Ի պատասխան ասաց. «Իշխանություններին հաճոյանալու որեւէ խնդիր չունեմ ու դա գիտեն հանձնախմբի անդամները, որոնց հստակ ներկայացրել եմ խնդիրները: Այսքանով սահմանափակվենք, մի օր հավանաբար կխոսեմ»:
Կարգալույծ քահանայից հետաքրքրվեցինք նաեւ՝ ինքն էլ է պահանջում Վեհափառ հայրապետի հրաժարականը: Ի պատասխան ասաց. «Եկեղեցին ունի վերափոխումների կարիք: Այդ փոփոխությունները բնական պրոցես են եկեղեցու կյանքից ներս: Սա գաղափարի, արժեհամակարգի պայքար է, մենք ուզում ենք մեր եկեղեցին տեսնել հավատավոր մարդկանցով լեցուն, հավատավոր բարձրաստիճան եկեղեցականներով, ազնիվ մարդկանցով, որոնց շահը համայնքի հոգիների փրկությունն է , ոչ թե օրինակ մի կաթ մոմ ավել ծախելը: Սա նորմալ պայքար եմ դիտարկում, որ երիտասարդ թեւը պայքարում է այն թեւի դեմ, որոնք իրենց սպառել են արդեն: Չեմ ուզում այդտեղ որեւէ մեկին մեղադրել, սա բնական պայքար եմ համարում, հույս ունեմ՝ այս պայքարում Աստծո կամքը կհաղթի»:
Երբ կարգալույծ քահանայից հետաքրքրվեցինք՝ ինչու իրենց պայքարը, եկեղեցու «բարեփոխման» մղումը համընկավ քաղաքական իշխանության օրակարգի հետ, նախկին քահանան ասաց՝ եկեք այսքանով սահմանափակվենք ու անջատեց հեռախոսը:
Արփինե ՍԻՄՈՆՅԱՆ
