«Կասկադ էներգո» ՍՊ ընկերությունը հանդիսանում է Ռուսաստանի խոշորագույն ինժեներական և շինարարական կազմակերպություններից մեկը։ Այն նաև մասնագիտացած է ցածր լարման էլեկտրական սարքավորումների նախագծման և արտադրության մեջ։ Արտադրությունն իրականացվում է նորագույն տեխնոլոգիաներով ու բարձրորակ սարքավորումներով՝ ապահովելով ԵԱՏՄ ստանդարտներին համապատասխան բոլոր վկայականները։
Ընկերությունը հիմնադրվել է 2005 թվականին՝ որպես բազմապրոֆիլ «Կասկադ» ընկերությունների խմբի մաս։ Այս տարիների ընթացքում «Կասկադ էներգո»-ն կուտակել է հսկայական փորձ արտաքին ինժեներական ցանցերի ու կապի մոնտաժման, ինչպես նաև մինչև 110 կՎ և բարձր լարման ենթակայանների ու հաղորդման գծերի կառուցման ոլորտներում։ Ընկերության կողմից կառուցված շենքերի շարքում են Ռուսաստանի Դաշնության խոշորագույն անշարժ գույքի ու ենթակառուցվածքային օբյեկտները։
«Կասկադ էներգո» ՍՊԸ-ի հայաստանյան մասնաճյուղն ընդգրկված է «Տաշիր» ընկերությունների խմբի կազմում։ Այն զբաղվում է բարձրավոլտ ենթակայանների կառուցմամբ, էլեկտրաէներգետիկ սարքավորումների, ինչպես նաև երրորդ սերնդի միաֆազ և եռաֆազ «խելացի» հաշվիչների արտադրությամբ, տեղադրմամբ ու սպասարկմամբ։
Կարդացեք նաև
Ընկերության տեխնոլոգիական ներուժը ամրապնդվում է Ռուսաստանի հայտնի «ՄԻՐՏԵԿ» ընկերության կողմից տրամադրված ծրագրային ապահովմամբ։ Այս լուծումները հնարավորություն են տալիս համատեղել էլեկտրաէներգիայի, գազի, ջրի և ջերմամատակարարման տվյալները մեկ միասնական տեղեկատվական հարթակում։
«Կասկադ էներգո» ՍՊԸ-ն արտադրում է KD-2 տեսակի միջին լարման ենթակայանային սարքավորումներ, որոնք հագեցած են հզոր ռելեական պաշտպանությամբ։
Այս պահին ընկերությունը սպասարկում է շուրջ 700 հազար բաժանորդ ամբողջ Հայաստանի տարածքում։ Աշխատանքներն իրականացվում են ժամանակակից «Պիրամիդա-2» ծրագրային համակարգի միջոցով։ Վերջինս GPRS ցանցի ու հատուկ ռադիոկապի միջոցով ապահովում է ինտեգրված տվյալների փոխանակում «Հայաստանի Էլեկտրական Ցանցեր» ընկերության հետ՝ էլեկտրաէներգիայի ընթերցելիության և սպառման, տվյալների ճշգրտման և այլ գործառույթների ուղղությամբ։
Այս էլեկտրոնային կառավարման համակարգերը թույլ են տալիս իրական ժամանակում մշտադիտարկել էլեկտրաէներգիայի՝ բաժանորդին հասնելու ողջ ճանապարհը։ Ընկերության կարգաբերող և արագ արձագանքման խմբերը աշխատում են հանրապետության մարզերում՝ տեղում առաջացող խնդիրներին արդյունավետ լուծումներ տալով։
«Կասկադ էներգո»-ն, համագործակցելով «Բարձրավոլտ Էլեկտրական Ցանցեր» ՓԲԸ-ի հետ, պետության պատվերով իրականացրել է ենթակայանների վերակառուցման և արդիականացման աշխատանքներ Հաղթանակ, Լիճք, Ագարակ-2, Շինուհայր և Արարատ-2 ենթակայաններում։ Բացի սարքավորումների արտադրությունից, ընկերությունը իրականացնում է լայնածավալ նախագծման և շինարարական աշխատանքներ՝ էներգետիկ ենթակառուցվածքների ոլորտում։
Այս պահին ընկերության կառուցվածքային ստորաբաժանումներում ու արտադրական շղթայի տարբեր օղակներում աշխատում է շուրջ 250 մասնագետ։
«Կասկադ էներգո» ՍՊԸ-ն սերտ համագործակցում է Հայաստանի Պոլիտեխնիկական համալսարանի հետ՝ ուսանողներին առաջարկելով պրակտիկայի հնարավորություն, իսկ լավագույններին՝ մշտական աշխատանք։ Այժմ արդեն 20 ուսանող աշխատանքի է անցել ընկերության տարբեր արտադրական ստորաբաժանումներում։
«Տաշիր» ընկերությունների խմբի միջոցով ընկերությունը հովանավորում է համալսարանի էներգետիկայի ֆակուլտետը, տրամադրելով գերազանց առաջադիմություն ունեցող ուսանողներին բարձր կրթաթոշակ՝ շուրջ 200 հազար դրամի չափով։
Բացի այդ, ընկերությունը համագործակցում է մասնավոր կազմակերպությունների հետ՝ տրամադրելով խելացի էներգետիկ լուծումներ Viva-ի, Ucom-ի, երկաթուղային և այլ ոլորտների համար։
Կազմակերպությունը մշտապես կատարելագործում է իր արտադրական գործընթացները՝ ներդնելով համաշխարհային լավագույն փորձն ու գիտելիքները։
