-Չի լինելու նման բան: Մենք 1905 թվականի Գաբոն քահանայի տարիներում չենք ապրում: Իմ ներկայությունն այստեղ ավելի շատ այն հարցն է բարձրացնում, որ եկեղեցին ու պետությունն իրարից անջատ են: Սահմանադրությունը դեռեւս ոչ մեկ չի առկախել, չնայած որոշ մարդիկ փորձում են խմբագրումներ անել, բայց կարծում եմ՝հաջողության չեն հասնելու,- այսօր լրագրողներին ասաց «Զվարթնոց» օդանավակայան Վեհափառ հայրապետին դիմավորելու եկած տնտեսագետ Հրայր Կամենդատյանը՝ պատասխանելով հարցին, թե արդյոք հնարավոր է սադրանք լինի ու Վեհափառ հայրապետին հենց օդանավակայանից ձերբակալեն:
Քաղաքագետ Էդգար Էլբակյանն էլ կարծիք հայտնեց, որ Վեհափառին մեկուսացնելու քայլեր իշխանության օրակարգում կան ու անպայման չէ, որ հենց այսօր դա մենք տեսնենք. «Այդ մտավախությունը կիսում էի երեկ, այսօր ու վաղն էլ կկիսեմ: Իշխանությունները թշնամական քաղաքականություն են վարում հայ ազգի, Հայաստանի ու սփյուռքի հանդեպ, եկեղեցին էլ բերել են այդ պայքարի կիզակետ, քաղաքականացրել են եկեղեցին ու եկեղեցուց հռչակել են քաղաքական թշնամի: Իսկ իրենք հայտնի են նրանով, որ երկրի ներսում ում հռչակում են թշնամի, դե երկրից դուրս թշնամի չունեն, սկսում են զբաղվել դրանով»:
Կարդացեք նաև
«Հայաքվեի» անդամ Վահե Դարբինյանն էլ լրագրողներին ասաց, որ Վեհափառ հայրապետի դեմ սկսված գործընթացը պայմանավորված է նրանով, որ նա խանգարում է այն գործընթացին, որը տանում է Փաշինյանը՝ Հայաստանի ամբողջական հանձնումը թուրքական իշխանությանը կամ ազդեցությանը:
Արփինե ՍԻՄՈՆՅԱՆ
Լուսանկարը՝ Սիվիլնեթի
